Dahata deriyên sînorî yekem care nîv tirilyon dînar derbas dike

Sebah

Deriyeke Sînorî ya Îraqê

Desteya Deriyên Sînorî yên Îraqê eşkere kir ku dahata darayî ya deriyan di meha Tîrmeha borî de hejmareke pîvanî tomar kiriye û 500 milyar dînar derbas kiriye, di heman demê de tedbîrên çavdêriyê, rûbirûbûna gendeliyê û qaçaxçîtiyê tên tundtir kirin.

Serokê Desteya Deriyên Sînorî yên Îraqê, Omer Ednan El-Wayilî ragihand ku; serdana Serokwezîrê Îraqê a ji bo baregeha desteyê, piştevaniyekî mezine ji bo hewldanên rûbirûbûna gendeliyê û bilindkirina asta çavdêriyê.

Wî da xuyakirin ku rêkarên nû, girêdana sîstema elektronîk û çavdêriya rasterast a balafirxane û benderan, rola sereke di bilindbûna dahatê de hebûye, bi rengekî ku di meha Tîrmehê de rêjeya dahatê cara yekemîne ku gihîştibû 560 milyar dînaran.

Serokê desteyê her wiha diyar kir ku, Serokwezîr rênimayî daye ku hevrêziya tam bi desthilata dadwerî û aliyên çavdêriyê re bê kirin û pêşîniya sereke jî ji bo rêgirtina li qaçaxçîtiya madeyên hişber û dermanan bê dayîn, ji ber ku ew ji bo asayişa civakê gef in.

Derbarê projeyên stratejîk de jî, El-Wailî zelal kir ku pêngav ji bo elektronîkkirina karûbaran û girêdana wan bi sîstema "Asycuda" ve hatine avêtin, armanca vî karî hûrgilîkirina pisule û bawernameyên çavkaniya kelûpelan e, ligel gotûbêjkirina planên projeya "Rêya Geşepêdanê" û karakirina tranzîtê, bi awayekî ku pozîsyona Îraqê wekî pireke erdnîgarî di navbera Ewropa û welatên Kendavê de xurtir dike.

PUKMEDIA