Serokwezîrê Îraqê: Divê kompaniyên petrolê 24 demjimêran kar bikin

Ragihandina Serokwezîrê Îraqê

Wêneyekê Civînê

Serokê Encûmena Wezîran a Îraqa Federal Elî Falih El-Zeydî, îro Duşemê ferman da ku divê kompaniyên petrolê 24 demjimêran bixebitin, di heman demê de tekezî li ser girîngiya lezkirina dîtina çareseriyên pratîkî bi rêya nûjenkirin û pêşvebirina boriya veguhastina petrolê kir.

Nivîsîngeha Ragihandinê ya Serokwezîrê Îraqê, di daxuyaniyekê de ku (PUKMEDIA) kopiyek jê wergirtiye, ragihand: "Serokê Encûmena Wezîran, Elî Falih El-Zeydî, serokatiya civîneke berfireh a Wezareta Petrolê kiriye, bi amadebûna wezîrên darayî û petrolê, rêveberê nûsîngeha Serokê Encûmena Wezîran, cîgirên wezîr û rêveberên giştî yên li hemû beş û pêkhateyên wezaretê de."
Li gorî daxuyaniyê: "Di civînê de plan û stratejiyên ku ji aliyê wezaretê ve hatine amadekirin, mekanîzmayên rûbirûbûna bandorên krîza Tengava Hormizê, û çareseriyên pêşniyarkirî ji bo misogerkirina birêveçûna hinardekirina petrola Îraqê û zêdekirina kapasîteyên wê yên hinardekirinê hatin gotûbêjkirin."

Her wiha di civînê de siyaset, plan û çareseriyên guncaw ji bo rûbirûbûna bandorên krîzê, misogerkirina berdewamiya hinardekirina petrolê û xurtkirina dergehên alternatîf ên hinardekirinê hatin gotûbêjkirin û tekezî li ser "girîngiya lezkirina dîtina çareseriyên pratîkî bi rêya nûjenkirin û pêşvebirina boriya veguhastina petrolê û girêbestên bi kompaniyên cîhanî re ji bo bazarîkirin û firotina petrola Îraqê" hat kirin.

El-Zeydî ferman da ku "Kompaniyên petrolê 24 demjimran bixebitin, bi mebesta misogerkirina berdewamiya proseyên hilberîn û hinardekirinê û zêdekirina rêjeyên wan, bi veberhênana mercên heyî û veguherandina krîzê bo derfeteke serkeftinê, bi riya pêşvebirina binesaziya petrolî û berfirehkirina dergehên hinardekirinê."

PUKMEDIA