Li Bexdayê rêveberekî polîsan û karmendek hatin kuştin

AFP

Bexdada Paytext

Di encama aloziyeke ku di dema pêngaveke rakirina zêdegaviyan de li Bexdayê derket, rêveberê polîsên emîndariya Bexdayê û polîsek hatin kuştin, her wiha çar karmendên din jî birîndar bûn û gunehbarekî bûyerê hate girtin.

Şaneya Ragihandina Ewlehiyê ya Îraqê eşkere kir ku di dema cîbicîkirina erka fermî de ji bo rakirina zêdegaviyên niştecihbûnê li navçeya Dora ya li başûrê Bexdayê, hêzên ewlehiyê û tîmên xizmetguzariyê ji aliyê xwediyên zêdegaviyan ve rastî gulebaranê hatin.

Şaneyê da zanîn ku di encamê de, Emîd Hîşam Mihemed ku rêveberê Beşa Polîsê ya emîndariya Bexdayê li beşa Kerxê bû û polîsek hatin kuştin, her wiha çar karmendên din jî birîndar bûn ku pêk hatine ji karmendekî polîsê federal, du karmendên polîsê emîndariyê û karmendekî emîndariya Bexdayê.

Di heman demê de, bi fermana Fermandarê Operasyonên Bexdayê, hêzên ewlehiyê dorpêçeke tund xistin ser navçeyê û dergeh girtin. Di operasyoneke lêgerînê ya berfireh de heta niha kesekî gunehbar hatiye girtin û lêgerîna li pey tawanbarên din jî berdewam e.

Ji aliyekî din ve, serokwezîrê Îraqê di peyameke sersaxiyê de ragihand: "Me hêzên xwe yên ewlehiyê raspartine ku navçeyê dorpêç bikin û tedbîran tund bikin, û hemû kesên ku di vê kiryarê de hatine tawanbarkirin dê bên darizandin."

PUKMEDIA