Parlamenterê YNKê hewl dide sê daxwazên girîng di budçeyê de bên cîbicîkirin

Ragihandina Encumena Nûneran

Civîna Parlamentoya Îraqê/ Arşîv

Bi îmzaya beşek ji parlamenteran û piştevaniya serokê Parlamentoya Îraqê, sê daxwazên girîng arasteyî lîjana darayî hatin kirin, daku di budçeya bê de werin çareserkirin, endamekî Encûmena Nûnerên Îraqê jî radigehîne: Hêvîdarim ku tevahiya fraksiyonan û bi taybetî fraksiyonên Kurdistanî, hevkar û piştevanê van daxwazan bin daku bi hewla hevpar em bigihêjin encamekê.

Endamê Encûmena Nûnerên Îraqê Dr. Biryar Reşîd, ji malpera fermî ya Yekîtiya Nîştimanî ya Kurdistanê PUKMEDIA re ragihand: Di dema borî de ji bo çareserkirina sê pirsên girîng, me îmzeyên pêwîst ên endamên Encûmena Nûnerên Îraqê kom kirin, bi piştevaniya serokê parlamentê, di heman demê de bi awayekî fermî arasteyî lîjana darayî hat kirin daku di çarçoveya budçeya giştî ya bê de çareseriyeke yasayî û darayî ji wan re bê dîtin.

Her wiha Dr. Biryar Reşîd ragihand: Daxwaz ji van babetan pêktên; peydakirina derfetên damezrandinê û terxankirina pileyên taybet ji bo wan derçûyên ku ji ber rewşa darayî û aborî ya salên borî derfeta damezrandinê ji wan re çênebûye, bi taybetî ji ber pêwîstiya berdewam a nexweşxane û saziyên tenduristiyê bi pisporiyên wan. Di heman demê de me daxwaz kiriye ku maf û şayesteyên darayî û îdarî yên pile bilindkirina fermberan, ku di salên borî de ji ber pirsgirêkên darayî hatibûn paşxistin, bi awayekî dadperwerane werin cîbicîkirin û cudahî di navbera fermberên Herêmê û navçeyên din ên Îraqê de neyê kirin.

Dr. Biryar Reşîd amaje bi wê yekê jî kir ku, daxwaza me ya dawî jî piştevaniye ji bo daxwaza nêzîkî 700 mamosteyên wanebêj, ku hinek ji wan 10 heta 12 salan xizmet kirine, lê di proseya guhertina wanebêjan bo girêbest de nehatine beşdar kirin û me daxwaz kiriye ku mafê wan bê vegerandin û xizmetên wan li ber çavan bên girtin û pêdiviya darayî ji bo vegerandina wan bo saziyên perwerdeyê bê dabînkirin. Em hêvîdarin ku tevahiya fraksiyon û bi taybetî fraksiyonên Kurdistanî, hevkar û piştevanên van daxwazan bin daku bi hewla hevpar em bigihînin encamê.

PUKMEDIA