Karwan Yarweys: Daxwaza cîbicîkirina madeya 140 mafekî destûrî ye

PUKMEDIA

Karwan Yarweys

Berpirsê Melbenda YNKê li Xaneqînê Karwan Yarweys, nûçeya derketina fermana girtina xwe red dike û ragihand ku, biryare sibe şandeyeke nûnerên Xaneqînê li Bexdayê bi Serokkomarê Îraqê re ji bo pirsa madeya 140 bicive.

Biryarbû ku îro xwepêşandan li Xaneqînê li dijî guhertina demografiyê pêk were, lê ji ber metirsiya ewlehiyê ji bo demekê nayê zanîn hat paşxistin û polîsê Xaneqînê jî ragihand: Tu fermaneke girtinê ji bo Karwan Yarweys negihiştiye destê wan.

Di wê barê de jî berpirsê melbenda Xaneqînê ya Yekîtiya Nîştimanî ya Kurdistanê Karwan Yarweys, ji PUKMEDIA re got: Hemû ew dengoyên ku behsa derketina fermana girtina min dikin, ji rastiyê dûr in.

Wî her wiha got jî: Çalakiyên wan di çarçoveya destûrê de ne û sibe ji bo daxwazkirina mafên neteweyî yên kurd û cîbicîkirina madeya 140ê, li Bexdayê rû bi rû bi serokkomarê Îraqê re dicivin.

Da xuyakirin jî ku; biryara helpesardina xwepêşandanan ji ber parastina jiyana çalakvanan û nebûna piştrastiya ewlehiyê bûye, ne ku ji ber fişarên yasayî.

Derbarê dengoya girtina 41 rojnamevan û çalakvanan de, da xuyakirin: Bi awayekî fermî ti tişt negihiştiye wan, lê ew daxwaz dikin ku girtî werin azadkirin û ferman werin hilweşandin.

Wî her wiha anî ziman û got: Daxwazkirina cîbicîkirina madeya 140 mafekî destûrî ye û nabe rêgirî li daxwazên yasayî yên xelkê navçeyê bê kirin.

Di heman demê de çavkaniyekî ji polîsê Xaneqînê ji PUKMEDIA re piştrast kir ku tu fermana fermî ji bo girtina Karwan Yarweys negihiştiye wan. Ev daxuyanî di demekê de ye ku dengoyeke berfireh li ser pêngava girtinê li sînorî hatiye belavkirin, lê berpirsên YNKê li navçeyê dibêjin armanca wan a sereke tenê daxwazkirina mafên wan ên destûrî ye ji hikûmeta federal û biryar e bi serokomar Nizar Amêdî re pirsa têkdana demografiya bajar gotûbêj bikin.

PUKMEDIA