Nûnerên Xaneqînê: Serokomar peywendî kir û me xwepêşandan rawestand

PUKMEDIA

Bajarê Xaneqîn

Rêkxerên xwepêşandana ku biryar bû îro li bajarê Xaneqînê dest pê bikra, daxuyaniyek dan û tê de tekez kirin ku wan lidarxistina xwepêşandanê daye sekinandin, piştî ku ji aliyê Serokomarê Îraqê û Serokê Lijneya Têkildarî Cîbicîkirina madeya 140ê ve peywendî bi wan re hatiye kirin. Her wiha ragihandin ku ew ê sibê bi Serokomar re bicivin, bi armanca gihandina daxwazên xelkê Xaneqînê.

Li jêr naveroka daxuyaniyê ye:

"Bi navê Xwedayê Mezin û Dilovan

Ji bo parastina aştiya civakî, yekrêziya xelkê navçeya Xaneqînê û parastina ewlehî û aramiya bajarê me, em dixwazin ji xelkê xwe yên birûmet re diyar bikin ku me peywendiyek ji Serokomarê Îraqê û Serokê Lijneya Têkildarî Cîbicîkirina madeya (140) ya Destûrê wergirtiye, û ji bo me re li gel wan rojek hatiye destnîşankirin ku ew jî sibê ye, daku em rasterast û bi awayekî fermî daxwazên xelkê Xaneqînê bigihînin wan.

Lewma, li ser bingeha vê vexwendinê, biryar hat dayîn ku xwepêşandan bê sekinandin û sibê neyê lidarxistin, ne ku bê betalkirin. Ev yek ji bo wê ye ku derfet bê dayîn ji bo peywendî û hevdîtina bi aliyên pêwendîdar re, û daxwaz û mafên me bi awayekî herî zelal û bi rêbazekî şaristanî û qanûnî, dûrî her cure alozî yan bilindbûnekê werin gotûbêjkirin.

Em ji xelkên xwe yên birûmet re tekez dikin ku xwepêşandan nehatiye betalkirin, lêbelê ji bo demekê hatiye sekinandin heta ku lijne ji Bexdayê vedigere, encamên hevdîtin û peywendiyan û her wiha tiştên ku li ser daxwazên xelkê Xaneqînê hatine kirin tên zanîn. Piştre dê rewş bê nirxandin û biryara guncaw bê standin, bi awayekî ku xizmeta mafên xelkên me bike û ewlehî û aramiya bajarê me biparêze.

Em zarokên Xaneqînê ne û tekez dikin ku Xaneqîn bajarê me hemûyan e, û em ji bilî xêr, ewlehî û aramiyê ti tiştekî din ji bo wê naxwazin, her wiha em naxwazin bajarê me rastî tu fitne, nakokî yan ziyanekê bibe. Erka me hemûyan e ku em yekrêziya xelkê wê û tevna wê ya civakî biparêzin, û bi rêbazên qanûnî û destûrî daxwaza mafên xwe bikin.

Di heman demê de, em tekez dikin ku daxwazên me rewa ne û em ê dest ji wan bernedin, û em ê wan bigihînin aliyên bilind û berpirs, bi taybetî daxwazên me yên têkildarî cîbicîkirina madeya (140ê) ya destûrî û mafên xelkê Xaneqînê.

Ji vir ve, em spasiya xwe ya kûr û pêzanîna xwe pêşkêşî hemû xelkê birûmet ê Xaneqînê dikin ji ber pêşwazî, bersivdayîn û piştgiriya wan, û em helwesta wan a niştimanî û berjewendiya wan a mezin a ji bo mafên bajar û xelkê wê bilind dinirxînin.
Xaneqîn me dicivîne, yekrêziya me hêza me ye, mafên me yên ku em bi qanûn û destûrê daxwaz dikin, û ewlehiya bajarê me û xelkê me li ser hemû pîvanan e."

PUKMEDIA