Fraksiyona YNK:Divê li gorî madeya 140 serederî digel herêmên Kurdistanî bê kirin

PUKMEDIA

Fraksiyona Yekîtiya Niştimanî ya Kurdistanê (YNK) li Civata nûneran ya Îraqê

Fraksiyona Yekîtiya Niştimanî ya Kurdistanê (YNK) li Civata nûneran ya Îraqê di daxuyaniyekê de derbarê rewşa Xaneqînê ragihand ku, em bi dilgiraniyeke mezin rewşa Xaneqîn û deverên Kurdî yên Diyalayê dişopînin, pêwîste li gorî destûra bingehîn ya Îraqê ya herdemî û yasayên Iraqê yên derbazdar bi wan re mijûl bibin.

Naveroka daxuyaniyê:

Daxuyaniya fraksiyona YNKê ya li Civata Nûneran ya Îraqê derbarê rewşa Xaneqînê de

Em bi dilgiraniyek mezin rewşa Xaneqîn û deverên Kurdî yên Diyalayê dişopînin,pêwîste li gorî destûra bingehîn ya Îraqê ya daîmî û yasayên Îraqê yên derbazdar bi wan re mijûl bibin.
Çalakiyên sivîl û aştiyane mafekî ku bi destûrî hatiye gerantîkirin e, nemaze eger mijar pêkanîna destûr û maddeya 140 be.

Em daxwaz dikin ku rewş bê zor û girtin were çareserkirin û hestyarî û taybetmendiya rewşa Xaneqîn û van deveran li ber çavan were girtin.

Em daxwaza serbestberdana girtiyan û betalkirina hemû fermanên girtinê yên li dijî siyasetmedar, çalakvan û ciwanan dikin.

Divê guhertinên demografîk, navçeyên Celewla û Qeretepe, rakirina navçeyên Seidiye û Qeretepe werin betalkirin û li gorî destûr û madeya 140-an werin çareserkirin, û divê hemû rêkarên li dijî destûrê werin rawestandin.

Di dawiyê de, peyama me ji bo xelkê serbilind yê Xaneqîn û deverên Kurdî yên Diyalayê ye, em dizanin ku ew di bin fişareke mezin de ne û herêma we bi gelek pirsgirêkan re rû bi rû ye;em ji we dixwazin ku hûn bi awayekî aştiyane û li gorî destûr û yasayên mafên xwe biparêzin û em ji we re piştrast dikin ku em di fraksiyona YNKê de dê piştgiriyê bidin we û dê parêzvanê we yê destûrî û yasayî bin.

Fraksiyona Yekîtiya Niştimanî ya Kurdistanê (YNK) li Civata nûneran ya Îraqê

PUKMEDIA