Komîteya Koçberên Serêkaniyê: 725 malbat ji bo vegerê tên amade kirin

ANHA

Karwana vegera koçberên Serêkaniyê

Komîteya Koçberên Serêkaniyê derbarê ji nûve destpêkirina karwanên vegera koçberan bo gundên xwe daxuyaniyek weşand û diyar kir ku wê karwana koma yekemîn ji 725 malbatan pêk tê û di çend rojên bê de bi rêkevin.

Komîteyê bi daxuyaniyekê aşkere kiriye ku, ev koma ku wê bi rêkeve ji koçberên kampa Telai ya Serêkaniyê ye, ji nêzî 725 malbatan pêk tê.

Komîteyê diyar kir ku xebata li ser vegerandina koçberan ne tenê birêxistinkirina karwanane belkû şopandina hemû aliyên ewlehî, îdarî, xizmetguzarî û yasayî yên girêdayî proseya vegerê ye di nav de jî ewlehiya vegervanan, parastina maf û milkên wan û peydakirina hêmanên jiyanê û aramiya li herêmên vedigerin e.

Komîteyê anî ziman ku ew bi berdewamî tevahî pêşdeçûnên girêdayî dosyaya vegerê dişopînin, peywendî û hevrêziyê bi aliyên eleqedar re dikin ku koçberên vegerin biparêzin û mafên wan peyda bikin û tevahî tedbîrên guncaw pêk bînin ku zêdegavî yan jî binpêkirin li dijî wan neyên kirin mîna berê ji hêla hin komên çekdar ên derveyî qanûnê bûne.

Di heman demê de xebat û hevrêzî ji bo amadekirina şert û mercên guncaw ên vegerê li tevahî tax û navenda bajarê Serêkaniyê di demên pêş de tên kirin.

hêjayî gotinê ye ku piştî heft sala ji koçberiyê, karwana yekem a koçberên Serê Kaniyê roja Duşem 10/8/2026'an vegeriyan warên xwe lê ji aliyê erebên hawirde yên bajêr ve rastî êrşên tund hatin.

PUKMEDIA