Desteya Destpakiyê dest danî ser 94 belgename û samaneke zêde

Desteya Destpakiyê

Desteya Destpakî ya Îraqê

Di operasyoneke nû ya meydanî de ji bo nehêştina gendeliyê, Desteya Destpakiyê ya Îraqê li parêzgeha Selahedîn karî ku berpirsê beşa mulkiyetê li Rêveberiya Şaredariya Tikrîtê û karmendekî heman beşê destgîr bikin, piştî ku hat piştrastkirina ku destê wan di desteserkirina zeviyên welatiyan de heye.

Li gorî daxuyaniya Desteya Destpakiyê, tawanbar bi alîkariya hejmareke karmend û kesên raspartî, belgeyên mameleyên terxankirina erdên welatiyan bi bihayê pir kêm kirine û paşê xistine nava lîsteya fermî ya qonaxên belavkirina erdan, da ku bibin xwediyên wan û bifroşin û qezencê di navbera xwe de parve bikin.

Piştî wergirtina biryara dadger û girtina berpirs, di dema lêgerîna mala wî de dest danî ser 94 belgeyên zeviyan yên ser bi Şaredariyê û komeke belgeyên wergirtina mameleya welatiyan û miqdarek perên Îraqî û dolar, otomobîleke nû, tevî çekên sivik û miqdarek zêr.

Di heman demê de, karmendekî din ê heman beşê hat girtin ku li mala wî komeke belgeyên fermî yên şaredariyê, di nav de mameleyên terxankirina erd û veguhestina mulkiyetê hatibûn veşartin.

Di dawiyê de, Desteya Destpakiyê ya Îraqê ragihand: Niha bi biryara dadgerê dadgeha lêpirsînê ya destpakiyê, her du tawanbar li gorî madeyên (289/ 298) ên yasaya cezayan hatine ragihandin û lêpirsîna bi wan re berdewam e.

PUKMEDIA