Bi hezaran Kurd li Qamişlo: Zimanê me nasname û pêşeroja me ye

ANHA

Wêneyekê Xwepêşandana Ziman li Qamişlo

Bi hezaran Kurd ji hemû gund û bajarok û deverên herêma Cizîrê, li bajarê Qamişlo kombûn û bi yek dengî daxwaza bi fermi kirina zimanê Kurdî û bi cihkirina wê di destûra Sûriyê de kirin.

Beşdarên di kombûna girseyî de ku ji aliyê Înîsiyatîfa Gel ve li pêş Stadyuma Şehîdên 12ê Adarê li Qamişloyê hat lidarxistin û bi dirûşma "Zimanê me nasnameya me ye" hate destpêkirin, xwepêşanderan tekez kirin ku zimanê kurdî yek ji destkeftiyên Şoreşa Rojava ye ku bi hewl û fedakariya bi hezaran kesan pêk hatiye.

Bi hezaran welatiyên kurd ku ji bajar û bajarokên cûrbecûr ên herêma Cizîrê (Dêrik, Amûdê, Dirbêsiyê, Girkê Legê, Til Temir, Tirbespiyê, Qamişlo û Hesekê) hatibûn, bi nîşan û alên kurdî tevlî çalakiyê bûn, nerazîbûna xwe nîşan dan ku xwendina bi zimanê kurdî li sê dersên di hefteyê de tê sînorkirin, û daxwaz kirin ku perwerdehiya bi zimanê dayikê bê misogerkirin û zimanê kurdî li Sûriyê wekî zimanê fermî bê naskirin.

Hêjayî gotinê ye ku, çalakî û bertekên gel ji bo rûniştandina statuya zimanê kurdî û parastina wê ji dûrxistin û bêparbûnê di nava Destûra Sûriyê de didomin. Ev yek bi taybetî piştî biryara Wezareta Perwerde û Fêrbûnê ya Hikûmeta Demkî ya Sûriyê di 27ê Tebaxa derbasbûyî de hat dayîn ku xwendina zimanê kurdî li sê dersên di hefteyê de sînordar kir.

PUKMEDIA