Mehane 2 mîlyar dolar ziyan digihêje dahata petrola Îraqê

PUKMEDIA

Bîrên Petrolê

Wezareta Petrolê ya Îraqê ragihand ku hinardeya petrolê ya welêt di meha Tebaxê de gihiştiye nêzî 70 milyon bermîlan, û da xuyakirin ku zêdebûna mîqdarên ku hatine hinardekirin di çarçoveya pêşkêşkirina erzanî û daşkandinaan li ser bihayên petrolê yên Îraqê de ye, ji bo handana kampaniyan bo kirîna petrola xav û veguhastina wê di tengava Hurmizê de.

Pisporê di warê enerjî û peymanên petrolê de, Dr. Behcet Ehmed got ku hikûmeta Îraqê ji bo her bermîlekê daxistineke ku di navbera 26 û 28 dolaran de ye li gorî bihayên fermî dide kampaniyan, li hember wergirtina petrolê rasterast ji benderên Îraqê û hilgirtina berpirsiyariya veguhestina wê bi rêya Tengava Hurmizê.

Wî anî ziman ku ev polîtîka, li gorî hesabên ku dispêrin qebareya hinardeyê û bihayan, dibe sedema ziyaneke nêzî 2 milyar dolarî di mehekê de ji dahatên giştî re, di demekê de ku Îraq bi awayekî mezin dispêre dahatên petrolê ji bo fînansekirina budceya giştî û dayîna mûçeyan.

Ehmed diyar kir ku bihayên petrolê yên Îraqê li gorî cureyê xav diguhere, û da xuyakirin ku petrola sivik bi bihayên nêzî xavê Brênt tê firotin, di dema ku petrola navîn û giran bi daxistineke nêzî 10 dolarî ji bo her bermîlekê li gorî bihayê Brênt tê firotin.

Berdevkê fermî yê Wezareta Petrolê Selîm Rekabî roja 4/9/2026an ragihand ku "hinardeyên petrolê yên Îraqê di meha Tebaxê de gihîştine nêzî 70 milyon bermîlên petrola xav, bi dahateke destpêkê ya ku ji destpêka şer ve ya herî bilind e û gihîştiye nêzî 4 milyar û 500 milyon dolaran.

Wî da xuyakirin ku "ev hejmar girîngiya sektora petrolê û rola wê di piştgiriya aboriya neteweyî û xurtkirina dahatên giştî yên dewletê de nîşan didin.

Wî destnîşan kir ku lêçûn û metirsiyên veguhestina petrolê bi rêya Tengava Hurmizê faktoreke zêde ne di diyarkirina bihayên ku kampaniya qebûl dikin de, û da xuyakirin ku hin keştiyên ku di tengavê re derbas dibin dibe ku sîstematîkên şopandina xwe rawestînin, li gorî ku wî gotiye.


Li gorî hejmarên fermî yên Wezareta Petrolê, hinardeyên Îraqê rojane ji 2.33 milyon bermîlan derbas dibin, di dema ku valahiya di navbera bihayên firotina kêmkirî û bihayên cîhanî de, li gorî texmînên hatine kirin, dibe ku rojane ji 60.6 milyon dolarî derbas bibe.

Di heman çarçoveyê de, hat ragihandin ku Serokwezîrê Îraqê Elî Zeydî gotiye ku daxistinan bûye sedema kêmbûneke mezin di dahatên petrolê de, û tekez kiriye ku Îraq di bin siya şert û mercên bazara petrolê û kêşeyên hinardekirina xav bi rêya Tengava Hurmizê de neçar e ku vê siyasetê bişopîne.

PUKMEDIA