Zanîngeha Koyê di rêza cîhanî ya "GreenMetric" de pileya yekem bi dest xist

Taybet

Zanîngeha Koyê

Zanîngeha Koyê careke din pêşengiya xwe di asta akademîk û jîngehî de nîşan da û di rêza navneteweyî ya "GreenMetric" (UI GreenMetric) de ji bo sala 2026an, pileya yekem di nav hemû zanîngehên hikûmî û taybet yên Herêma Kurdistanê de misoger kir.

Ev destkefta nû, ku li ser bingeha pîvanên hûr ên berdewamî û parastina jîngehê di nava kampusa zanîngehan de hatiye bidestxistin، nîşana bername û cîbicîkirina plana stratejîk a Zanîngeha Koyê ye (2023-2027); planeke ku tê de pêşxistina berdewam، bikaranîna enerjiya paqij، kêmkirina bermahiyan û geşepêdana binesaziya kesk û dostê jîngehê di rêza pêşîn a karan de hatine danîn.

Di heman demê de ev pêngava mezin hevseng û temamkerê "Destpêşxeriya Zanîngeha Kesk" e ku ji aliyê Cîgirê Serokwezîrê Herêma Kurdistanê Qubad Talebanî ve hat ragihandin؛ bi armanca handana navendên xwendina bilind ji bo şopandina pênaseyên parastina jîngehê، têkoşîna li dijî guherîna avhewayê û berhemhênana enerjiya nûjenbar di navendên akademîk de. Zanîngeha Koyê jî karî bi riya bernameyên xwe yên zanistî û jîngehî modêleke pêşeng di çarçoveya vê destpêşxeriyê de pêşkêş bike.

Serokatiya Zanîngeha Koyê di daxuyaniyekê de ev serkeftin wekî "serbilindiyeke niştimanî ji bo sektora xwendina bilind a li Kurdistanê" bi nav kir û tekez kir ku ev destkefte berhema hewldanên berdewam ên staf û xwendekaran e ber bi guhertina zanîngehê ve wekî saziyeke nûjen û berdewam، ku tê de jîngeha fêrbûnê li gel parastina xwezayê re hevseng e.

Hêjayî gotinê ye  ku, rêzbendiya "GreenMetric" ku salane tê ragihandin، wekî yek ji pîvanên cîhanî yên girîng tê jimartin ji bo nirxandina zanîngehan di aliyê pabendbûna wan bi nirxên geşepêdana berdewam û karê ji bo paşerojeke kesk.

Bidestxistina vê pileyê di demekê de ye ku Zanîngeha Koyê di çend salên borî de pêngavên mezin avêtine ji bo xurtkirina têkiliyên navneteweyî û bilindkirina kalîteya xwendinê، ku ev yek bandora rasterast li ser bilindbûna navûdengê zanîngehê di rêzên cîhanî de kiriye.

PUKMEDIA