Li Kongoyê di ketina balafirekê de tevî 2 berpirsên leşkerî 14 kes mirin

AFP

Cihê bûyerê

Artêşa Kongoyê ragihandiye ku şeva borî di bûyera ketina balafireke ku ji bajarê Kikwitê vedigeriya paytext Kinshasayê de, 14 kes ku di nav wan de du berpirsên leşkerî yên pilebilind jî hene, hatin kuştin.

Berdevkê artêşa Kongoyê Major General Econfume Ekinge, daye xuyakirin ku kesên hatine kuştin, ji wan Serokê Dadgeha Leşkerî Lieutenant General Mutombo Katalay Tende, Dozgerê Giştî yê Hêzên Çekdar Lieutenant General Pacome Likulia, ligel 12 kes ji endamên şandê û tîma balafirê.

Ekinge diyar jî kiriye ku balafirê berî ku li devera Kengiyeyê bikeve xwarê rastî pirsgirêkeke teknîkî bûye, û tekez kir ku tevahiya kesên li ser balafirê jiyana xwe ji dest dane, di heman demê de lêkolînek hatiye vekirin da ku sedemên bûyerê werin eşkerekirin.

Artêşa Kongoyê li rojhilatê welêt bi dehan komên çekdar re ku Tevgera "M23" ya ku ji aliyê Ruandayê ve tê piştevankirin jî di nav de ye şer dike, li wir êrîşên berdewam bûn sedema ku serhildan dest deynin ser gelek bajarên sereke.

PUKMEDIA