Mezlûm Ebdî: Zimanê Kurdî nasnama me ye parastina wê armanca sereke ye

ANHA

Şêwirmendê Serokomariya Sûriyeyê Mezlûm Ebdî

Şêwirmendê Serokomariya Sûriyeyê Mezlûm Ebdî ji bo şagirt û malbatên wan peyamek derbarê mijara perwerdeya zimanê kurdî, rewşa dibistan, zanîngehên Rojavayê Kurdistanê de şand û daxwaz kir ku sala nû ya xwendinê dewam bikin.

Mezlûm Ebdî di peyameke bi dîmen bi rêya ANHA`yê weşand û got: Gelê me yê hêja zimanê kurdî nasnama me ye, parastin û pêşxistina zimanê kurdî her armancekî bingehîn a têkoşîna me heta roja me ya îro ye. Fêrkirin û xwendina bi zimanê dayikê mafeke xwezayî ya tevahî gelan û yê gelê Kurd de jî, fêrkirina bi zimanê kurdî mafekî bingehîne û xwezayî ye.

Ebdî ragihand: Di 14 salên borî ya Şoreşa Rojava de kedeke mezin ji bo fêrkirin û xwendina zimanê kurdî hat dayîn, di demekê de ku em di şer de bûn, sîstemeke xwendinê hat avakirin. Her çi qas kêmasî û lawazbûnê xwe hebûn, lê belê tiştekî nû bû û gaveke dîrokî bû di dîroka Rojava de.

Her weha bi vê boneyê Mezlûm Ebdî, tevahî malbatan ku bi ruxmî şer, zor û zehmetiyan zarokên xwe şandin dibistanên zimanê kurdî silav kirin, û Tevahî mamoste û karmendên ku bi keda xwe di fêrkirin û xwendina zimanê kurdî de di van 14 salên borî de danîn pîroz kirin.

Şêwirmendê Serokatiyê aşkere jî kir û got; Piştî rûxandina rejîma Baas`ê ev bû salek û 8 meh, hewildanên me ji bo ku zimanê kurdî bibe beşeke fermî di sîstema perwerdeyê di Sûriyeyê de têne kirin. Ji bo vê yekê gelek civîn, hewildan û danûstendin çêbûn, di encama wê de Wezareta Perwerdeyê di mijara zimanê kurdî de biryar da, gel û şagirtên me ji ber ku ev biryar têrker nedîtin xwepêşandan kirin û helwesta xwe dane xuyakirin, têkoşîn dane meşandin, ev vê yekê mafê şagirtên xwe dibînin, dîsa jî em li kêlek wan in.

Got jî: Ji ber ku sala xwendinê nû dest pê kiriye, em di pêvajoyeke veguhestinê de ne, pêwîste em sîstema xwendinê serkeftî dewam û derbas bikin. Ji bo ku zarokên ku di dibistanên kurdî de xwendine, zor û zehmetiyên nekşînin tedbîr hatine girtin, wê zarok zor û zehmetiyê nebînin wê li aliyekî fêrî zimanê erebî bibin, li aliyeke din jî wê xwendina xwe bi zimanê kurdî dewam bikin.

Fermandarê berê yê Hêzên Sûriyeya Demokratîk Mezlûm Ebdî daxwaz ji malbatan kir ku zarokên xwe bişînin dibistanên ku tê de zimanê kurdî esas tê girtin, ji bo ku ev sala xwendinê ya nû di vê pêvajoya veguhêz de serkeftî derbas bibe û sala pêşiya me em karibin di asteke bilindtir di mijarên zimanê kurdî de bidest bixînin, ev wê bibe bingeheke esasî ji bo ku em mafê xwe di mijara zimanê kurdî tevahî bidestbixin.

Tekez jî kir ku: Îsal wê xwendina refa 9 û bekeloriya (amadeyî) wê li gorî sîstema Rêveberiya Xweser were meşandin.
Ji bo wê daxwaziya min ji tevahî şagirtan ew e ku xwendina xwe di van her du refan de, li gorî sîstema xwendina kurdî ya berê dewam bikin, ji bo ku pêşeroja xwe bêhtir garantî bikin.

Mezlûm Ebdî bal kişand ser wê yekê jî ku: Hîn hevdîtin û danûstendin ji bo fermîyeta Zanîngeha Rojava û Zanîngeha Kobanê tên meşandin, biryara dawî hîn derneketiye ortê, lê belê em di wê hêviyê de ne ku wê di vê mijarê de jî biryareke guncaw li gorî şagirtên me yên her du zanîngehan de ne derkeve.

Daxwaza me ewe ku ji bo sala xwendinê ya nû ya her du zanîngehan şagirtên me yên belkeloriya yên ku bi zimanê kurdî pêk anîne, ji bo ku cihê xwe di her du zanîngehan de bigirin, ew mufadeleyên xwe li gorî sîstema ya Wezareta Perwerdeyê ya Bilind derxistiye pêşkêş bikin.

Di dawiya peyama xwe Mezlûm Ebdî, sala xwendinê ya nû li xwendekaran pîroz kir û ji bo wan serkeftin xwest.

PUKMEDIA