Trump li ser pêşniyara Îranê: Ya ku min berî salekê red kir îro jî qebûl nakim

Kovara Time

Serokê Amerîka Donald Trump

Serokê Amerîkayê Donald Trump ragihand ku destpêkirina êrîşên nû li ser Îranê pêkane û da xuyakirin ku Îraniyan pêşniyarek derbarê vekirina Tengava Hurmizê de pêşkêş kirine.

Trump di daxuyaniyên xwe de ji bo kovara "Time" a Amerîkî ku îro Pêncşemê hatine weşandin, got: "Îran di rewşeke gelekî xirab de ye û aboriya wê hilweşiyaye." Wî diyar jî kir ku "Îranî dixwazin peymanekê çêbikin, lê ez dixwazim ku ew peymaneke rastîn be."

Derbarê redkirina xwe ya ji bo pêşniyara herî dawî ya Îranê ya ji bo rawestandina şer de, Trump got: "Ya ku min berî salekê red kir, ez îro jî qebûl nakim," û da xuyakirin ku "Îraniyan pêşniyarek derbarê vekirina Tengava Hurmizê de pêşkêş kirin, û min li hin aliyên wê nêrî ne li hemûyan, lê bi kurtî ew ne bes e."

Trump da xuyakirin ku "destpêkirina êrîşên li ser Îranê piştî hilbijartinên nîvê serdemê li Amerîkayê pêkane." Tekez jî kir ku "Wîlayetên Yekbûyî Amerîka Tengava Hurmizê di rûyê Îranê de girtiye û di bin kontrola wan de ye."

Duh roja Çarşemê desthilatdarên Îranê ragihandin ku wan bersiva fermî ya Amerîkayê ya li ser pêşniyara xwe ya ji bo bidawîkirina şerê li Rojhilata Navîn wergirtine, ev jî çend roj piştî ku Trump plan red kir.

Berdevka Hikûmeta Îranê Fatime Muhaceranî got: "Wezîrê Derve Ebas Îraqçî di civîna hikûmetê de pêşniyara Amerîkayê pêşkêşî Serokomar Mesûd Pizîşkiyan kiriye."

PUKMEDIA