Peyama Nizar Amêdî bi boneya Roja Nîştimanî

Nûsîngeha Serokomar

Serokomarê Îraqê Nizar Amêdî

Serokomarê Îraqê Nizar Amêdî, di daxuyaniyekê de ragihand: Bi boneya Roja Nîştimanî ve, em germtirîn pîrozbahî û xweştirîn hêviyên xwe pêşkêşî xort û keçên gelê xwe dikin.

Naveroka daxuyaniyê:

Bi boneya Roja Nîştimanî ve, em germtirîn pîrozbahî û xweştirîn hêviyên xwe pêşkêşî xort û keçên gelê xwe dikin.
Di demekê de ku em wêstgeheke girîng a di dîroka welatê xwe de tînin bîra xwe, ew dema ku Îraq di sala 1932an de bû dewleteke serbixwe û endam di Komeleya Neteweyan de.

Di vê boneyê de, em sedsalek ji dîroka Îraqê bi hemû bûyer û werçerxanên ku dîtine ve tînin bîra xwe, her wiha ew şer, qeyran, asteng û nehemêtiyên ku gelê me tê re derbas bûye; tevî hemû wan tiştan jî, Îraqî bi welatê xwe ve girêdayî man û karîn bi ser zehmetiyan de serbikevin û careke din rabin ser piyan.

Îro berpirsiyariya me ew e ku em ji rabirdûyê ders û pendan werbigirin û xalên ku me dicivînin ji her tiştê ku me ji hev vediqetîne xurtir bikin, her wiha bi giyanekî nîştimanî yê hevbeş ve di berjewendiya Îraqeke aram û seqamgîr de bixebitin; dewletek ku jiyaneke hêja û bi rûmet, xizmetguzariyên çêtir û derfetên kar ên rastîn ji welatiyên xwe re peyda bike.

Avakirina paşeroja Îraqê berpirsiyariya her kesî ye, ev yek jî pêdivî bi hevkariyeke dilsoz di navbera saziyên dewletê, hêzên nîştimanî û civakê de heye, ligel danîna berjewendiya welatî û paşeroja nifşan li ser hemû pîvan û nirxekî din.

Di vê boneyê de em bîranîna şehîdên nîştiman û fedakariyên wan bilind radigirin û tekez dikin ku di pêşiya me de karekî zêde maye ku em bikin, di heman demê de derfetên me yên mezin li pêşiya me hene ji bo avakirina Îraqeke bihêztir, seqamgîrtir û pêşketîtir.

Bila her sal Îraq û gelê xwê di xêr û xweşiyê de bin.

Nizar Amêdî
Serokomar

PUKMEDIA