Serok Bafil: Pirsgirêkên me bi PDK re ne mezin in û em dikarin bi diyalogê Îraqê bi rê ve bibin

PUKMEDIA

Dîdara MERI

Bafil Celal Talebanî Serokê Yekîtiya Nîştimanî ya Kurdistanê, di Dîdara MERI de ragihand: Herêm di bin metrasiyeke mezin de ye û pêwîst e em siyasetatiya xwe li Bexdayê biguherînin, ji ber ku Îraqeke dewlemend û aram tê wateya Kurdistaneke dewlemend û aram.

Bafil Celal Talebanî Serokê Yekîtiya Nîştimanî ya Kurdistanê, di dîdarê de di bin navnîşana “Li wê deverê ya ku em tê de hevpar in Pêşxistina aramî, hevkarî û xweşguzarî” derbarê avakirina Kurdistaneke xurttir, yekgirtin, aram û hevpişkiya navçeyî de ragihand ku herêm di rewşeke metirsîdar de ye û giring e ku em wekî welatên derdora xwe xwe amade bikin û bi aliyên din re li hev bikin ji bo rûbirûbûna rewşê, ji ber ku ji aliyê aborî ve rewşa hemû cîhanê xirab e û li Îraq û Kurdistanê jî metirsiya ewlehî û aborî heye, lewma pêwîst e em çareyan bibînin.

Wî her wiha got: Divê em hemû piştgiriyê bidin proseya aştiyê, di vê demê de jî Yekîtiya Nîştimanî ya Kurdistanê kar li ser peywendiyên dîrokî dike û di çend waran de wan bi pêş ve dibe, di heman demê de peywendiyên me yên navdewletî gelekî baş in û bi piraniya aliyan re peywendiya me heye û peyama Yekîtiyê jî zelal e.
 

Yekîtî tu carî ne bûye û nebê şopdarê ti kesî

Derbarê têkiliyên navneteweyî yên Yekîtiya Nîştimanî ya Kurdistanê (YNK) de, Serok Bafil diyar kir û got: Ez serbilind im ku têkiliyên me bi Amerîka, Îran, Rûsya, Brîtanya û gelek welatên cîhanê re hene, lê YNK tu carî ne bûye şopdarê ti kesî û wê nebe jî, ji ber wê yekê her kesê ku dibêje YNK rojev an biryarên welatan cîbicî dike, tu tiştî di siyasetê de fêm nake.

Li ser avakirina hikûmeta nû ya Herêma Kurdistanê de jî, wî da zanîn: Danûstandinên ji bo avakirina hikûmetê pêşveçûnan bi xwe re tînin, û em dikarin di nava 24 demjimêran de hikûmetê pêk bînin, lê divê em pêşî pirsgirêkên heyî çareser bikin. Di van rojên borî de civînên baş hatine kirin, li wir birêz Qubad Talebanî û Mesrûr Barzanî hevdîtinên gelekî erênî di vî warî de pêk anîn, her wiha min bixwe jî bi birêz Şaswar Ebdulwahîd re hevdîtin kirin û têkiliya me bi hemû aliyan re heye û civînên din ên alîkî dûrî çavên medyayê jî hene.

Serok Bafil her wiha zêde kir: Heke şer careke din derkeve, di nava Yekîtiya Nîştimanî de bernameya me ya taybet heye, û em dikarin mil bi milê Partiya Demokrata Kurdistanê (PDK) gelê xwe biparêzin, ji ber ku kordînasyoneke baş di navbera me de heye.

Îran xwedî xêzên sor e

Têkildarî vekişîna hêzên Amerîkî ji Îraqê got: Amerîka dikarîbû bi hêsaniyek mezin vegere Îraqê ji ber hebûna xwe li Urdinê, ku bi tenê 17 xulek dûrî wê ye.

Derbarê çekdanîna komên çekdar de li Îraqê, Serokê Yekîtiya Nîştimanî ya Kurdistanê got: Piraniya van koman bi radestkirina çekên xwe razî ne, û bi alîkariya Îranê em dikarin wan koman vegerînin da ku di bin sîwana hikûmeta Îraqê de bin, lê ev yek dem û pêbaweriyê dixwaze.

Wî zêde kir: Îran xwedî çend xêzên sor e, û eger em derbasî wan xêzan nebin, Îran dê nebe gef li ser me. Ji ber vê yekê, di serdana xwe ya dawî de bo Îranê, me gotûbêj kir ka em ê çawa Kurdistanê bi giştî biparêzin di rewşeke ku şerekî nû di navbera Amerîka û Îranê de derkeve.

Îraqa xurt û yekgirtî di berjewendiya hemûyan de ye

Serokê Yekîtiya Nîştimanî got: Serokwezîrê niha yê Îraqê dixwaze guhertinên bingehîn bike û di heman demê de nêrîneke wî ya xirab li hember hikûmeta Herêmê nîne, ev jî ji bo kurdan tiştekî bi sûde û divê hemû Kurdistan fêm bike ku îro ne wekî salên 2003 û 2004an e ku wê demê Îraq qels bû û Herêm xurt bû, lê îro berevajî vê yekê ye, Îraqeke xurt û geş tê wateya Kurdistaneke xurt û geş.

Rêkeftina me bi "Nifşê Nû" re cidî ye

Derbarê rêkeftina di navbera Yekîtiya Nîştimanî û Nifşê Nû de wî got: Rêkeftina me bi Tevgera Nifşê Nû re cidî ye, ji ber ku ev rêkeftin berî her tiştî ji bo Partiya Demokrat re fêde ye, ku mezintirîn partiya opozisyonê ev fêm kiriye û dixwaze di avakirina hikûmetê de alîkar be. Ji lewra nayê qebûlkirin ku di medyayê de şîroveyên derewîn werin belavkirin ku dibêjin Yekîtiya Nîştimanî Nifşê Nû dixapîne, û em niha ji bo her cûre rêkeftineke wekhev ji bo avakirina hikûmetê amade ne, di demekê de ku hemû kes dizanin hikûmeta berê tijî kêmasî û qelsî bû.

Em ê dest ji mafên gel bernedin

Serok Bafil Celal Talebanî diyar kir ku "ji bo lihevkirina bi Partiya Demokrata Kurdistanê (PDK) re, min 16 caran serdana Hewlêrê kir, lê mixabin em negihîştin ti lihevkirinekê, digel ku ji aliyê siyasî û stratejîk ve ti cudahiyeke me ya mezin di navbera me de nîne û pirsgirêkên me ne mezin in, em amade ne ku ji mafên xwe werin xwarê, lê em ne amade ne ku dest ji maf û daxwazên gelê Kurdistanê berdin.

Serokê Yekîtiya Nîştimanî ya Kurdistanê (YNK) di beşekî din ê axaftina xwe de bal kişand ser rewşa aborî û hevsengiyên herêmî û diyar kir ku heta krîza Tengava Hurmizê neyê çareserkirin, divê mirov li bendê nebe ku pêşveçûneke mezin a aborî çêbibe. Her wiha da zanîn ku krîza aborî ne tenê li Îraqê ye, belkî welatên Ewropayê jî girtiye ber xwe.
 

Deriyê Yekîtiya Nîştimanî her tim ji bo diyalogê vekirî ye

Serok Bafil amaje bi wê kir û got: Heke aliyên din jî wekî Yekîtiya Nîştimanî siyaseteke zelal bişopînin, pirsgirêkên me yên li Herêma Kurdistanê dê bi hêsanî werin çareserkirin, ji ber ku ti gotinên me li pişt perdeyê nînin, em dikarin bi Tirkiye, Bexda, Îran û Amerîkayê re bigihîjin lihevkirinekê, lê em nikarin bi birayên xwe yên li nava Partiya Demokrat re li hev bikin, gelo çima? Yekîtiya Nîştimanî her tim deriyê diyalogê vedike û ji bo lihevkirinê amade ye, lê belê demeke me ya dirêj nemaye.

Wî her wiha got: Kîjan daxwaz ji aliyê birayên me yên li Rojavayê Kurdistanê ve bê kirin, me berê alîkariya wan kiriye û em niha jî amade ne. Di heman demê de ez bi paşeroja kurdan a li Sûriyeyê re geşbînim û ji wan dixwazim ku di karên xwe de hinekî lezê bikin.

Peywendiyên me yên bi Tirkiyeyê re baş in û vegeriyane rewşa xwe ya asayî, em pêdiviya wan bi me heye û pêdiviya me jî bi wan heye. Tirkiyeyê jî ew fêm kiriye ku pirsgirêka kurdan, PKK li çiyayan bi diyalog û dîplomasiyê tê çareserkirin û em ê jî bibin alîkar. Di heman demê de em di nava diyalogê de ne ku bi Îrana welatê cîran re jî pêvajoyeke wiha ji bo kesên me yên ezîz li Îranê werin şopandin.

Îro 12-10-2026an karên Foruma MERI di bin dirûşma "Li herêma ku em tê de parve dikin, Xurtkirina aramî, hevkarî û xweşgozariyê" de dest pê kir û ew ê du rojan bidome, ku tê de ronahiyê dide ser gelek pirsên hestiyar û girîng ên xwecihî û herêmî.


PUKMEDIA