Bexdad mêvandariya gera 52emîn a welatên Rêxistina Hevkariya Îslamî dike

Wezareta Derve

Logoya Rêxistina Hevkariya Îslamî

Wezareta Derve ya Îraqê ragihand ku amadekariyên pêwîst ji bo mazûvaniya paytexta Bexdadê ji bo xebatên gera 52.mîn a Encûmena Wezîrên Derve yên Rêxistina Hevkariya Îslamî hatine temamkirin. Tê payîn ku ev civîn di 17 û 18ê vê mehê de bi beşdariya 55 welatên endam û çavdêr be lidarxistin.

Berdevkê xebatên gera pêncî û dûyemîn a encûmenê Balyoz Hesenên Kamil di daxuyaniyekê de ku PUKMEDIAyê dîtiye, got: "Civîn dê di bin dirûşmeya «Gotûbêj û Piştevanî du stûnên bingehîn in ji bo xurtkirina aştiye û geşepêdana berdewam, di bin siya pirsgirêkên herêmî û navneteweyî de ku pêdivî bi zêdekirina şêwirdariyê û xurtkirina xebata hevbeş di navbera welatên endam de heye» de bên lidarxistin."

Hesenên Kamil diyar kir ku "beşdarî dê ligel welatên endam û çavdêr, hejmarek ji mêvanan jî li xwe bigire, di serî de Cîgira Sekreterê Giştî yê Neteweyên Yekbûyî Emîne Mihemed, her wiha nûnerên nêzîkî 40 rêxistinên ne hikûmî."

Berdevk da zanîn ku "amadekariyan li darxistina gera şandiyan li çend cihên olî û dîrokî yên wekî Kazmiye, E’zemiye, navendên bazirganî û deverên cuda yên Bexdadê jî dihewîne, ji bo danasîna mîrateya dîrokî û şaristanî ya paytextê.

Tekezjî kir ku "Îraq hêvî dike ku xebatên vê gerê encamên rasteqîn û pêkanîner bînin ku beşdarî xurtkirina bandora Rêxistina Hevkariya Îslamî bibin, asta hevahengiya di navbera welatên endam de bilind bikin, û prensîbên hevbeş veguherînin bername û însiyatîfên kiryarî yên ku xizmeta berjewendiyên gelên wan dikin."

Her wiha anî ziman ku "mazûvaniya Bexdadê ji bo vê gerê derfetek e ji bo nûvekirina vekirina Îraqê li ser derdora xwe ya îslamî, xurtkirina têkiliyên xwe yên bi welatên endam re, û diyarandina rola paytextê di hembêzkirina gotûbêjan, nêzîkirina nêrînan û piştgiriya însiyatîfên ku armanc dikin aloziyan kêm bikin û aramiya herêmî û navneteweyî biçînin."

PUKMEDIA