Berhemanîna petrola rojane ya Kerkûkê bo 450 hezar bermîlan tê bilindkirin

PUKMEDIA

Bîrên Petrolê

Di çarçoveya stratejiya hikûmet û wezaretê de, Îraq asta berhemanîna petrola Kerkûkê bo 450 hezar bermîlan di rojekê de bilind dike.

Wezîrê petrolê yê Îraqê Basim Mihemed Xizêr ragihand ku: Wezareta wan plan dike ku berhema petrolê li çar zeviyên petrolê yên Kerkûkê bo 450 hezar bermîlan di rojekê de bilind bike.

Li gorî daxuyaniyeke Wezareta Petrolê, di çarçoveya stratejiya hikûmet û wezaretê de ji bo pêşvebirina pîşesaziya neft û gazê, rêvebirina xebatên çar zeviyên Kerkûkê, yanî Kerkûk, Bay Hesen, Xebaz û Cembûr, ji Kompaniya Petrola Bakur û Kompaniya Gaza Bakur veguherî desteya rêveberiya hevpar a wan zeviyan.

Wezîrê Petrolê da xuyakirin ku "Kompaniya BP (British Petroleum) hevparêkî stratejîk e di warê veberhênana neft û gazê de, û xebatên bi ruhê tîmeke yekgirtî re ligel vê kompaniyê dê bibin alîkar ji bo çareserkirina astengî û pirsgirêkên li pêşiya projeyê."

Li gorî daxuyaniyê, proje ligel kompaniya Brîtanî ne tenê di warê berhemanîn û veberhênana neft û gazê de sînordar e, belkû di qonaxa pêşerojê de perwerdekirina kadroyên wezaretê, veguhestina pisporî û teknolojiyê, û her wiha avakirina binesaziya xizmetguzariyê ji bo niştecihên herêmî jî dihewîne.

PUKMEDIA