12 koçber di deryaya Îcê de fetisîn

PUKMEDIA

Derya

Li gorî raporên medyayî berî sibeha îro Duşemê, 19ê Tışrînî Pêşîn ji ber binavbûna du qeyikên cuda yên koçberan li Deryaya Îcê ya nêzîkî giravên Samos û Lêsbos ên Yûnanistanê, 12 koçberan jiyana xwe ji dest dan.

Di bûyera yekem de li nêzîkî girava Samosê, ji ber serobinkirina qeyikeke ku koçber tê de bûn li dûrahiya 3.7 mîl li bakurê giravê, 6 kesan jiyana xwe ji dest dan.

Pasewanên peravên Yûnanistanê karîn 14 kesan xilas bikin û sê ji xilaskiriyan ji bo wergirtina çareseriyê rakirin Nexweşxaneya Giştî ya Samosê, di dema ku proseya lêgerîn û pişkinînê de berdewam bû.

Di bûyereke din a cuda de li nêzîkî girava Lêsbosê, 6 koçberên din ku yek ji wan pitikekî sawa bû, jiyana xwe ji dest dan, ev jî piştî ku qeyikek ku ji Tirkiyeyê hatibû, li keştiyeke pişkinînê ya pasewanên peravên Yûnanistanê xist û qeyik serûbin bû. Di vê bûyerê de 8 kes hatin rizgarkirin û rakirin nexweşxaneyê.

Desthilatdarên Yûnanistanê welatiyekî Tirk ê 37 salî girtine ku tê gumanbarîkirin ku ajokarekî yek ji qeyikan e û di qaçaxçîtiya mirovan de cî girtiye.


PUKMEDIA