Serokomar û Şahê Urdinê tekezî li ser girîngiya hevrêziya hevpar kirin

Malpera Serokomar

Serokomarê Îraqê û Şahê Urdinê

Serokomarê Îraqê Nizar Amêdî di pêwendiyeke telefonî de ligel Şahê Urdinê Şah Ebdullahê Duyem, îro Duşemê 19ê Cotmeha 2026an, behsa xurtkirina peywendiyên biratiyê yên di navbera her du welatan de û her wiha pêşhatên rewşa navçeyê kirin.

Serokomar di pêwendiya telefonî de tekezî li ser xurtkirina peywendiyên di navbera Komara Îraqê û Keyaniya Haşimî ya Urdinê de kir, ku ji têkiliyên dîrokî û xwişk û biratiyê yên di navbera her du gelên birayî de çavkaniyê digirin, û bal kişand ser pêwîstiya berfirehkirina derfetên hevkariya hevpar, bi taybetî di warên bazirganî, enerjî û teşwîqkirina veberhênanên dualî de, bi awayekî ku xizmeta berjewendiyên hevpar bike û piştgiriyê bide derfetên pêşketin û geşepêdanê li her du welatan.

Her wiha di pêwendiyê de behsa rewşa xaka Filîstînê hat kirin, bi taybetî li Kenara Rojava û Kerta Xezayê. Her du aliyan tekez kirin ku pêwîst e civaka navdewletî bi awayekî çalak tevbigere da ku êrîş û binpêkirinên dubare bên rawestandin, parastin ji bo Filîstîniyan bê dabînkirin û jiyana sivîlan bê parastin. Her wiha her du aliyan piştgiriya xwe ji bo bidestxistina mafên rewa yên gelê Filîstînê nû kirin.

Derbarê pêşhatên rewşa herêmê de, Serokomar û Şah Ebdullah tekezî li ser pêwîstiya xurtkirina hevrêziyê û xebatê ji bo kêmkirina alozî û rageşiya herêmî kirin, û her wiha destnîşan kirin ku divê diyalog û têgihiştin wekî rêbazek ji bo çareserkirina krîz û nakokiyan bên girtin, daku ji berfirehbûna dorhêla şer û pevçûnan bê girtin û ewlehî û stabîlîteya herêmê bê parastin.

Şah Ebdullahê Duyem bangeke fermî arasteyî Serokomar Nizar Amêdî kir daku serdana Urdinê bike, û helwêsta welatê xwe ya di piştgiriya ewlehî û serweriya Îraqê de dubare kir, her wiha daxwaza welatê xwe ya ji bo xurtkirina peywendiyên hevkariyê di hemû waran de anî ziman, bi armanca ku alîkariyê bide aştiya herêmî û navdewletî, rûbirûbûna astengiyên hevpar û bidestxistina daxwazên gelên navçeyê yên di warê geşepêdan û pêşketinê de.

PUKMEDIA