Fransa.. Qedexeya çûnûhatinê serkeftî bû

PUKMEDIA

Firansa

Serokwezîrê Fransayê ragihand: Piştî ku me qedexeya çûnûhatinê li hin cihan bi cih anî, duh bi şev rewş li wan cihan aram bû. Wî herwiha tekez kir ku biryarên nû ji bo ferzkirina qedexeya çûnûhatinê dê werin derxistin "li her derê ku rewş pêdivî bike".

Şeva borî qedexeya çûnûhatinê ya şevê li gelek bajarên Fransayê, di nav de beşek ji taxên paytextê (Parîs) jî, ket warê cîbicîkirinê û ev yek wekî bertekek li hemberî tundûtûjiyên xwepêşandanên dijî giranbûna jiyanê bû. Di hember de, hikûmetê dupat kir ku ew ê bi tundî reftarî li gel kesên ku tundûtûjî û talankirinê dikin bike.

Desthilatdarên Fransayê ji duh ve (19.10.2026) qedexeya çûnûhatinê li hin navçeyên Parîsê, bi taybetî li derdorên Meydana Komarî û navçeya "Les Halles" û herwiha li bajarê Lille, Douai, Wattignies û Denain ê li bakurê Fransayê ragihandin. Li paytextê jî, organîzekirina xwepêşandanan li çend taxan ji demjimêr 8 ê êvarê û pê ve hat qedexekirin.

Ev tedbîr piştî hefteyeke tijî nerazîbûnan tên, ku tê de tundûtûjî û talankirin li seranserê Fransayê çêbûn, di demekê de ku hikûmetê heta niha tu bersivek nedaye daxwazên xwepêşanderan. Di heman demê de, banga xwepêşandaneke nû ji bo roja şemiya bê (24.10.2026) tê kirin.

PUKMEDIA