Hozan Dîno: Dixwazim serdana Silêmaniyê jî bikim

Kurdistanî Nwê

Hunermend Hozan Dîno

Hunermendê navdar ê kurd Hozan Dîno, di hevpeyvîneke taybet de ligel rojnameya Kurdistanî Nwê re, behsa qonaxên cuda ên jiyana xwe ya hunerî dike, tekezî li ser rola hunerê di parastina ziman, çand û dîroka kurd de dike, her wiha dixwaze serdana Silêmaniyê bike û konsêrteke hunerî li vî bajarî ji bo wî bê sazkirin, daku berhemên xwe yên hunerî pêşkêşî gelê xwe bike.

Di vî warî de, hunermendê navdar ê kurd Hozan Dîno ji Holendayê ve ji Kurdistanî Nwê re axivî û ragihandiye ku, ji temenê neh saliyê de hezkirina xwe ji bo karê hunerî hebûye û dibêje: Destpêka min jî bi lêxistina tembûrê bûye, lêbelê di sala 1991ê de min yekem stran di Navenda Çand û Hunerê ya Mezopotamyayê de li Stenbolê tomar kiriye.

Hozan Dîno her wiha got: Heya niha min zêdetirî 130 stranan tomarkirine û piraniya berhemên min di çarçoveyê hunera kurdî de xwedî girîngiyeke taybet in, bi taybetî di warê ziman û peywendiyên çandî de, her wiha çiyayê Zagros û xwazayê Kurdistanê di nava babetên girîng ên peywendîdarî berhem û stranên min de tên danîn, çimkî her gava şerekî an karesatekê bi ser gelê kurd de hatibe bi dirêjahiya dîrokê, çiyayê Zagros penagehek bûye ji bo parastina gelê me.

Her wiha dibêje: Bi mixabinî ve tenê dostê milletê me çiyayê Zagros e û ti piştgirî û alîkariyek ji gel û neteweyên din ên cîhanê negihaye me, lewma çiyayê Zagros her dem wekî sembola berxwedanê, hêviyê û penageha aramiyê tê dîtin, ji ber wê yekê ye ku çiyayê Zagros di piraniya stran û berhemên min de reng vedaye.

Dîno diyar jî kir û got: Îsal min serdana Başûrê Kurdistanê kir û min konsêrteke hunerî li bajarê Zaxoyê li dar xist, lê serdana min nîvco maye, ji ber ku ez dixwazim serdana bajarê Silêmaniyê jî bikim û konsêrteke hunerî li wir jî li dar bixim. Lewma bi rêya rojnameya Kurdistanî Nwê, ez daxwazê ji aliyên peywendîdar ên bajarê Silêmaniyê dikim ku alîkarî û hêsankirina pêwîst ji min re bê kirin, daku ez bikaribim serdana bajarên Silêmaniyê, Helebceya şehîd û Ranyeyê bikim û berhemên xwe yên hunerî pêşkêşî xelkê wan bajaran bikim.

Wî her wiha got: Ez hêvîdar im ku ew keç û xortên ku daxwaza karê hunerî dikin, bi ziman û çanda xwe derkevin û bi rêya hunerê dîrok û şaristaniya xwe biparêzin, çimkî gelê kurd xwedî dîrok û çandeke dewlemend e û pêwîst e huner û hunera gelêrî ya gelê me bi hemû awayî bê parastin û neyê hiştin ku bê dizîn, pêwîst e em dîrok û şaristaniya xwe biparêzin û dewlemendtir bikin.

Her wiha Hoan Dîno da xuyakirin ku: Xebata zanistî ji bo me gelekî girîng e, çimkî dîrokeke me ya pir kêm a nivîskî heye, lê belê di van salên dawî de pêşveçûneke baş bi xwe ve dîtiye û pêwîst e hewldana zêdetir bê dan, çimkî huner xezîneya civakê ye û roleke girîng di zindî ragirtina civakê de dilîze. Ji ber wê pêwîst e keç û xortên kurd bi rêya hunerê dîrok û çanda xwe nas bikin û biparêzin.

Hunermend Dîno tekez kir ku, armanca xwe ya sereke yekîtiya gelê kurd e û dibêje: Ez li dijî dabeşbûna navxweyî ya kurdan im, ez ne bakurî, ne başûrî, ne rojhilatî , ne rojavayî me; ez kurd im û Kurdistanî me. Bi vî awayî ez armanca xwe ya hunerî nas dikim, min her tim hewl daye bibim hunermendê gelekî ku evîn û azadiya wî hatiye zeftkirin û axa wî hatiye dagirkirin, ti hêviyek bi paşeroja wan nemaye.

Hunermendê kurd ew yek jî anî ziman ku: Pêwîst e naverok û berhemên me yên hunerî li ser bingehê yekîtî û yekgirtinê bên tomarkirin, çimkî dîrokê selmandiye ku bi yekgirtin û xweragirtina xwe em dikarin hebûn û nasnameya xwe ya neteweyî biparêzin, ger em destê hev negirin û xwe neparêzin, kes destê me nagire û me naparêze.

Di dawiyê de Hoan Dîno got: Spasiya rêveberiya Zaxoyê dikim ji bo wê pêşwaziya germ a ku li bajarê Zaxoyê li min hatiye kirin, di konsêrta xwe de li Pira Delal a Zaxoyê, welatiyên her çar parçeyên Kurdistanê beşdar bûn, ev destkeft û xelateke mezin e di dîroka min a hunerî de. Ji ber wê ez daxwaz dikim ku serdana hemû bajarên Kurdistanê bi taybetî Silêmaniyê, bajarê çand û hunerê bikim, daku stranên xwe li wir jî pêşkêşî gelê xwe bikim.

Hêjayî gotinê ye ku navê xwe yê rastîn Yûsif Şahîn e, navê hunerî Hozan Dîno ye, di sala 1969an de li bajarê Erdexanê yê Bakurê Kurdistanê ji dayik bûye, xwendina amadeyî qedandiye, lê di dawiya sala zanîngehê de bi sedemeke taybet dev ji xwendinê berdaye.

Dîno di nava malbateke hunerî û welatparêz de li Bakurê Kurdistanê mezin bûye û ji sala 1998an ve li Holendayê dijî, piraniya jiyana xwe jî li derveyî welat derbas kiriye û xwediyê du keç û kurekî ye, wî her wiha çendîn xelatên hunerî li ser asta welatên Ewropayê bi dest xistine.

PUKMEDIA/ Kurdistanî Nwê