Li Fransayê 410 hezar xwepêşander beşdarî xwepêşandanan bûne

Reuters

Xwepêşandanên Fransa

Îro roja Şemiyê 24/10/2026, li Parîsê di navbera polîs û xwepêşanderan de pevçûn derketin, di heman demê de Wezareta Navxwe ya Fransayê ragihand ku, 410 hezar xwepêşander beşdarî xwepêşandanên civakî yên li seranserê welat bûne û ji wan 110 hezar li Parîsê bûne.

Ev yek di demekê de bû ku tedbîrên tund ên ewlehiyê hatibûn girtin da ku pêşî li dubarebûna bûyerên tevlîhevî û talanê yên dawiya heftiya borî li Fransayê bê girtin.

Wezîrê Navxwe (Laurent Nunez) ragihand ku; heta êvarê rayedaran 135 kes desteser kirine ku hinek ji wan di encama lêgerînên pêşwext de hatine girtin û di dema lêgerînê de lîstikên agirîn, gogên hesinî û tiştên din ên ku dikarin wekî çek bên bikaranîn hatine dîtin.

Hikûmetê 70 hezar endamên polîs û cendirmeyan di  nava bajaran de bi cih kirin, ku ev yek 10 hezar ji hejmara ewlehiyê ya di xwepêşandanên 17ê Cotmehê de zêdetir e. Ew xwepêşandan ji ber nerazîbûna li hember bilindbûna buhayên jiyanê û xizmetên giştî yên xerab hatibûn destpêkirin û veguherîbûn hinek ji tevliheviyên herî xirab ku welat di nava çend salên borî de dîtibû.

Civîna sereke ya li Parîsê bi rengekî aştiyane dest pê kir berî ku pevçûn derkevin, di heman demê de polîsan li Lyonê ku sêyemîn bajarê herî mezin ê Fransayê ye, gaza rondikrêj li ser girseyan reşand.

Serokê Çepgir yê Radîkal Jean-Luc Melenchon ku tevlî xwepêşanderan bû, diyar kir ku rayedar dixebitin da ku kombûnan asteng bikin û demên bidawîbûnê ferz bikin, ku ev yek ji bo rêxistinan zehmet dike ku rêzên xwe ji nû ve sererast bikin.

Xwepêşandan bi aloziyên ku piştî bûyereke gulebaranê ya roja Înê li rojavayê Parîsê pêk hatin re hevdem bûn; di encamê de kesek hat kuştin û çar kesên din jî birîndar bûn, ku di nav wan de keçeke 12 salî jî hebûye.

PUKMEDIA