لەنێوان عەشق، سیاسەت و بیرەوەریدا

عیماد ئەحمەد

ژیان هێڵێکی ڕاست نییە کە بێ پێچ‌وپەنا لە لەدایکبوونەوە بگاتە کەناری پیری؛ ڕووبارێکە، جارێک بە نەرمی لەنێوان گوڵەکاندا دەڕوات و جارێک خۆی بە بەردەکاندا دەکێشێت. منیش لەم ڕووبارەدا، لەنێوان عەشق، سیاسەت و بیرەوەریدا، گەشتێکی درێژم کردووە؛ گەشتێک کە ئومێد چرای تاریکترین شەوەکانی بووە.

یەکەم دڵەڕاوکێی عەشق، یەکەم بەئاگاهاتنەوەی دڵ بوو. لەو ساتەدا جیهان هەمان جیهانە، بەڵام هەموو شتێک مانایەکی تازە وەردەگرێت؛ ناوێک دەبێتە گۆرانی و نیگایەک دەبێتە پەیام. دواتر تێگەیشتم کە عەشق تەنها خۆشەویستیی نێوان دوو مرۆڤ نییە؛ دەتوانێت باڵ بگرێت و ببێتە خۆشەویستیی گەل، نیشتمان و ئازادی.

کاتێک باوەشم بۆ سیاسەت کردەوە، سیاسەت بۆ من ڕێگای دەسەڵات و پلەوپایە نەبوو؛ پەیامی پیرۆزی کۆمەڵەی ڕەنجدەرانی کوردستان و خەونی دادپەروەری و کەرامەتی مرۆڤ بوو. لەو سەردەمەدا هەر وشەیەک نرخ و هەر هەنگاوێک مەترسییەکی هەبوو. زیندان و ئەشکەنجە هەوڵیان دا جەستە بشکێنن، بەڵام نەیانتوانی بیر و باوەڕ بخنکێنن. لەوێ فێر بووم ئازادی، پێش ئەوەی دەرگایەکی کراوە بێت، دۆخێکە لە ناخی مرۆڤدا.

دیداری شەهید ئارام و ناسینی مام جەلال و کاک نەوشیروان، منی لە سێ ڕووخساری خەبات نزیک کردەوە: قوربانیدان، فراوانیی دید و بەردەوامیی پرسیارکردن. لە خاڵە شەهاب، کاک عەلی عەسکەری و هاوڕێکانیانیش فێر بووم کە ئیرادە، چەکی بەهێزتری تێکۆشەرە.

لە درێژایی ئەم ڕێگایەدا، جەمیل ڕەنجبەر، ئازاد هەورامی، عەشقی، ملازم جوامێر، سادق شەریف، سەلام عەبدولڕەزاق و دەیان هاوڕێی نازدارمان لەدەست دا؛ بەڵام ناو و پەیامیان لە بیرەوەریماندا زیندووە. نەخۆشیی کاک کۆسرەت و هێرۆخانیش برینە کۆنەکانمان دەکولێنێتەوە. ئێستاش لەگەڵ کاک بافڵ و نەوەی نوێدا پشتیوانم، بۆ ئەوەی خۆری یەکێتی ئاوابوون نەناسێت.

باوکایەتی و باپیرایەتیش فێریان کردم کە داهاتوو لە باوەشی خێزاندا گەشە دەکات. ئەمڕۆ عەشق، سیاسەت و بیرەوەری بە سێ ڕێگای جیاواز نابینم؛ هەموویان لە مرۆڤدا کۆ دەبنەوە. جەستە پیر دەبێت، بەڵام ئەگەر ئومێد لە دڵدا بمێنێت، ڕۆح هەمیشە لە سەرەتای بەیانێکی نوێدایە.

PUKMEDIA