سەرۆکی روسیا: هەڵسەنگاندن بۆ کارکردن لەگەڵ کۆمپانیا ئەمریکییەکان دەکەین

میدیاکان

ڤلادیمێر پوتن سەرۆکی روسیا

سەرۆکی روسیا رایدەگەیەنێت، وڵاتەکەی هەڵسەنگاندن بۆ کارکردنی هاوبەش لەگەڵ کۆمپانیا ئەمریکییەکان لە پرۆژەکانی وزە لە ناوچەی جەمسەری باکوور دەکات،دەشڵێت: روسیا لە یەدەگی غازی سروشتیدا لە پلەی یەکەمی جیهاندایە و لە بەرهەمهێنانیشدا لە پلەی دووەمدایە

لە وتارێکیدا لە هەشتەمین لوتکەی کۆڕبەندی وڵاتانی هەناردەکاری غاز کە لە مۆسکۆ بەڕێوەچوو، ڤلادیمێر پوتن سەرۆکی روسیا ئاماژەی بەوە کرد، وڵاتەکەی ئامادەیە بۆ هاوکاریی تەکنەلۆژی لە بواری غازی سروشتیدا و هەروەها ئامادەیە ئەو تەکنەلۆژیایانەی پەرەی پێداون، لەگەڵ وڵاتانی دیکەدا هاوبەشی پێبکات.

لە بەشێکی دیکەی وتارەکەیدا، سەرۆکی روسیا رایگەیاند: تا ماوەیەکی پێش ئێستا هاوبەشەکانمان لە ئەوروپاوە لە کێڵگەکانماندا لەگەڵمان کاریان دەکرد، لە کاتێکدا هاوبەشە چینییەکانیشمان بەردەوامن لە کارکردن، لە ئێستاشدا هەڵسەنگاندن بۆ کارکردنی هاوبەش لەگەڵ ئەمریکا دەکەین.

هاوکات ئاماژەی بە پێگەی وڵاتەکەی لە بازاڕی جیهانیدا کرد و رایگەیاند، روسیا لە یەدەگی غازی سروشتیدا لە پلەی یەکەمی جیهاندایە و لە بەرهەمهێنانیشدا لە پلەی دووەمدایە، هەروەها بەردەوامە لە بەهێزکردنی سەربەخۆیی تەکنەلۆژی لە کەرتی وزەدا.

PUKMEDIA