پەرلەمانتارێك: ناكرێت قوتی خەڵك تێكەڵی ململانێی سیاسی بكرێت

دادگای باڵای فیدراڵی عیراق

دادگای باڵای فیدراڵی عیراق

دادگای باڵای فیدراڵی عیراق بڕیاری ئەنجومەنی وەزیرانی بۆ ناردنی 400 ملیار دینارەكە بۆ هەرێمی كوردستان هەڵوەشاندەوە، لە كاتێكدا رێككەوتنی سیاسیی پێكهێنانی كابینەی نوێی حكومەتی عیراقی تەئكید لەسەر ئەوەكراوەتەوە كە "مووچە و بودجە"ی هەرێم لە ملمڵانێی سیاسییەكان دووربخرێتەوە.

لەپێكهێنانی هاوپەیمانی بەرێوەبردنی دەوڵەت كە زۆربەی هێزە سیاسییە عیراقییەكانی بەشدار لە حكومەت تێیدا بەشدارن، لە ناویاندا یەكێتیی نیشتمانیی كوردستان و پارتی دیموكراتی كوردستان، دیالۆگ و گفتوگۆ بنەمای چارەسەری كێشەكان دەبێت، بەتایبەتی لە نێوان بەغدا و هەولێر لەسەر دۆسییەكانی بودجە و مووچە و یاساكانی نەوت و غاز و ماددەی 140.

 وەفدی یەكێتیی نیشتمانیی كوردستان بە سەرۆكایەتی سەرۆك بافڵ جەلال تاڵەبانی لە گفتوگۆ و دانوستانەكانی بۆ پێكهێنانی حكومەت و كابینەی نوێ و هەروەها لە كۆبوونەوەكانی هاوپەیمانی بەڕێوەبردنی دەوڵەت بە راشكاوی رایگەیاندووە: "نابێت ژیان و گوزەرانی هاووڵاتیانی هەرێم تێكەڵ بە ناكۆكی و ململانێ سیاسییەكان بكرێت".

لەسەر ئەو بنەمایەش یەكێتی هەوڵەكانی خستەگەڕ بۆ ئەوەی 400 ملیار دینار بۆ مانگەكانی 11 و 12ی 2023 بۆ هەرێمی كوردستان بنێردرێت و سەرۆك وەزیرانیش بڕیاری لەسەردا، بەڵام دادگای فیدراڵی بۆ بڕیاردان لەسەر ئەو سكاڵایەی لە دژی محەمەد شیاع سودانی تۆماركرابوو لەبارەی بڕیارەكانی ئەنجومەنی وەزیران بۆ راسپاردنی وەزارەتی دارایی بە ناردنی بڕە پارەیەك بۆ هەرێمی كوردستان كۆبووەوە و شەش بڕیاری ئەنجومەنی وەزیرانی لەبارەی ناردنی پارە بۆ هەرێم هەڵوەشاندەوە.

لە ناوەڕاستی مانگی رابردوودا ئەنجومەنی وەزیران رەزامەندی پیشاندا لەسەر ناردنی 400 ملیار دینار بۆ هەرێمی كوردستان بۆ مووچەی مانگی 11 و 12ی فەرمانبەران، بەڵام تائێستا پارەكە لەلایەن وەزارەتی دارایی عیراقەوە رەوانە نەكراوە.

وەك كاردانەوەش چەند كەسایەتی و چاودێرێكی سیاسی عیراق ناڕەزاییان بەرامبەر بڕیارەكەی دادگای فیدراڵی دەربڕی.

لەوبارەیەوە د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە سایتی رەسمی یەكێتیی نیشتمانیی كوردستان PUKMEDIA ی رایگەیاند: "ئاڵۆزی پەیوەندییەكانی نێوان هەرێم و بەغدا هۆكارێكی سەرەكییە تا ئەوەی هەموو كات دادگای فیدراڵی بژێوی خەڵك وەكو چەكێك بەرامبەر خەڵكی هەرێمی كوردستان بەكاربهێنێت".

"بەپێی دەستوور مافی خەڵكی هەرێمی كوردستانە كە وەك پارێزگاكانی دیكەی عیراق سوودمەندبن لەو ئابورییەی كە لە وڵاتەكەدا هەیە، ئەمە جگە لەوەی حكومەتی عیراق تا ئێستا هیچ قەرەبوویەكی ئەو هەموو زیانەی هەرێمی كوردستانی نەكردووەتەوە كە لەسەر دەستی رژێمی عیراق زەرەرمەند بوون" د.نەرمین مەعروف وادەڵێت.

راشیگەیاند: " لە رابردوو و ئێستاشدا هەوڵمان زۆرداوە كە قوت و بژێوی ژیانی خەڵكی هەرێمی كوردستان تێكەڵی ململانێ سیاسییەكان نەكرێت بەڵام هەر جارە و بەبیانووەك دادگای فیدراڵی بڕیار لەدژی خەڵكی هەرێم دەدات و جارێكی دیكە سزای خەڵكی دایەوە".

نەوفل حەمدانی چاودێری سیاسی عیراقی لە ئەكاونتی خۆی لە تویتەر دەڵێت: "دژی سیاسەتی برسیكردنم و هەرێمی كوردستان بەشێكە لە كۆمەڵگەی عیراقی و ئەو گەلە خۆشەویستە تێكەڵ بە گەندەڵەكانتان مەكەن".

هاوكات عەلی بیدەر چاوێری سیاسی عیراقی لە تویتێكدا دەنوسێت : "ئەو بڕیارەی دادگای فیدراڵی عیراق سەبارەت بە رەتكردنەوەی ناردنی پارە بۆ هەرێم، هۆكارە بۆ دروستكردنی قەیرانێكی نوێ كەكار دەكاتەسەر كاركردنی حكومەت كە لە ئۆقرەییەكی رێژەیدایە".

"زەرمەندی یەكەم لەم بڕیارەدا خەڵكی هەرێمی كوردستان و پێویست دەكات قوتی ژیانیان بەدوور بێت لە قەیرانە سیاسییەكان".