دووەمین کۆنفرانسی راگەیاندن بەسەرکەوتویی کۆتاییهات

PUKMEDIA

دووەمین کۆنفرانسی راگەیاندنی یەکێتی

ئەمڕۆ هەینی ١٢-١-٢٠٢٤ دووەمین کۆنفرانسی راگەیاندنی یەکێتیی نیشتمایی کوردستان بە سەرکەوتووی کۆتایی هاتوو، کۆی هەر ٥ لیژنەکە راپۆرتەکانیان پێشکەشکرد و لیژنەی سەرپەرشتاری کۆنفرانسەکەش لەو راپۆرتانە پوختەیەکی پێشکەشی بە هەریەک لە لێپرسراوی مەکتەبی راگەیاندن و هۆشیاری و لێپرسراوی بۆردی راگەیاندنی یەکێتیی نیشتمانیی کوردستان کرد، بڕیاریشە سەرجەم بڕیار و راسپاردەکان لەڕێی لێپرسراوی مەکتەبی راگەیاندن و هۆشیاری و لێپرسراوی بۆردی راگەیاندنی یەکێتییەوە ئاڕاستەی مەکتەبی سیاسی و سەرۆکایەتی یەکێتیی نیشتمانیی کوردستان بکرێن.

عیماد ئەحمەد: راگەیاندنی یەکێتی لاسایی هیچ راگەیاندنێکی تر ناکاتەوە

 هەر لەکۆنفرانسەکەدا عیماد ئەحمەد لێپرسراوی مەکتەبی راگەیاندن و هۆشیاری یەکێتیی نیشتمانیی کوردستان وتارێکی پێشکەشکرد و رایگەیاند:" خۆشحاڵم بەسەرکەوتویی کۆتایمان بە دووەمین کۆنفرانسی راگەیاندنی یەکێتیی نیشتمانیی کوردستان هێنا، ئێمەی یەکێتی وەک چۆن لەم دوو رۆژەشدا بە تەواوی ئەوەمان بۆ دەرکەوت پێمان باشنییە لاسایی هیچ راگەیاندنێکی دیکە بکەینەوە و راگەیاندنەکانمان یەکێتییانەیەو خۆمان بەراورد ناکەین بەهیچ راگەیاندنێکی دیکە، پێویستیشە راگەیاندنەکانمان لەگەڵ گەل و نیشتماندا بێت و ساڵی نوێ ساڵی گۆڕانکاری زیاتر بێت".

وتیشی:" لەلیژنەکانی کۆنفرانسەکەدا بەشێکی زۆری گەنجان و ژنان بەوپەڕی تواناوە بەشدارییانکرد و راو پێشنیازەکانیان دەردەبڕی ئەمە مایەی خۆشحاڵیی و شانازییە بۆ هەموومان و پێویستە راسپاردەکان بخەینە بەردەست سەرکردایەتی و مەکتەبی سیاسی و سەرۆکی یەکێتی، تاوەکو بچێتە بواری جێبەجێکردنەوە و  هەوڵبدەین بە زوترین کات جێبەجێبکرێن و مافی راگەیاندکارانمان مسۆگەر بکەین، ئەمەش دوا کۆنفرانس نابێت و ئەم سەرکەوتنە سەرکەوتنی تری بەدواوە دەبێت".

لەتیف نێروەیی: بەسەرکەوتویی کۆتایمان بە دووەمین کۆنفرانسی راگەیاندنی یەکێتی هێنا

هاوکات لەتیف نێروەیی لێپرسراوی بۆردی راگەیاندنی یەکێتیی نیشتمانیی کوردستان وتاری کۆتایی کۆنفرانسی پپێشکەشکرد و رایگەیاند: بەخۆشحاڵییەوە بەسەرکەوتویی کۆتایمان بە دووەمین کۆنفرانسی راگەیاندنی یەکێتیی نیشتمانیی کوردستان هێنا، دەرەنجام و ئیرادەی راگەیاندنکارانمان سەلماندنی گۆڕانکاری و بەرەوپێشچوونیان دەوێت".

وتیشی:"داوای لێبوردن لەو هاوکارو دڵسۆزانەمان دەکەین کە بە هەر هۆکارێک بوبێت بێبەشبوون لەبەشداریکردن لەم کۆنفرانسە، هاوکات سوپاسی زۆرمان بۆ ستران عەبدوڵڵا کە ماوەیەکی زۆر خزمەتیکرد و هەموو هەوڵەکانی بۆ سەرخستنی میدیای یەکیتی خستەگەڕ".

دوای ١٤ ساڵ بۆردی راگه‌یاندنی یه‌كێتیی نیشتمانیی كوردستان لەماوەی دوو رۆژدا دووهه‌مین كۆنفرانسی خۆی به‌ ئاماده‌بوونی نزیكه‌ی ٣٥٠ ئه‌ندامی كۆنفرانس و زیاتر له‌ ٤٠ پسپۆڕ‌ و شاره‌زای راگه‌یاندن و ژماره‌یه‌كی زۆر له‌ ئه‌ندامانی مه‌كته‌بی سیاسی و سه‌ركردایه‌تی بە سەرکەوتوویی ئەنجامدا، كه‌ ئامانج لێی رێكخستنه‌وه‌و داڕ‌شتنه‌وه‌ی سیاسه‌تی میدیایی یه‌كێتیی نیشتمانیی كوردستان و ئاماده‌سازیی بوو بۆ قۆناغی نوێی راگه‌یاندن.

PUKMEDIA