قوباد تاڵەبانی: تەنیا یەکێتی کەرەستەی چاکسازی و راستکردنەوەی حوکمڕانی هەیە

PUKMEDIA

کۆبوونەوەی قوباد تاڵەبانی و سەرۆک تیمەکانی گەنجانی یەکێتی لە ئیدارەی راپەڕین

قوباد تاڵەبانی رادەگەیەنێت: "جگە لە یەکێتی، هیچ لایەنێکی دیکە کەرەستەی پێویستی نییە بۆ چاکسازی و راستکردنەوەی رێڕەوی حکومڕانی". 

قوباد تاڵەبانی، لێپرسراوی مەکتەبی سکرتارییەتی سەرۆک مام جەلال لە کۆبوونەوەی لەگەڵ سەرۆک تیمەکانی گەنجانی یەکێتی لە ئیدارەی راپەڕین رایگەیاند: "لەم هەڵبژاردنەدا گەورەترین دەرفەت بۆ سەرکەوتنی یەکێتی دروست بووە و ئامانجی گەورە و سەرەکی یەکێتیش ئەوەیە بە تۆمارکردنی سەرکەوتنێکی گەورە لەم هەڵبژاردنەدا رێڕەوی حکومڕانی لە هەرێم راست بکاتەوە".

لێپرسراوی مەکتەبی سکرتارییەتی سەرۆک مام جەلال لە دەستپێکی وتەکانیدا دۆخی یەکێتی لە ماوەی ساڵانی نێوان ٢٠٠٩ بۆ ٢٠٢٢ شی کردەوە کە لەو ماوەیەدا و لە دروستبوونی بزووتنەوەی گۆڕانەوە تا دوای ساڵی ٢٠٢٢ رۆژ لە دوای رۆژ لاوازتر دەبوو و لەسەر ئاستی هەرێم و عێراق و نێودەوڵەتیشدا تەواو بێ کاریگەر ببوو، بەڵام لەم سێ ساڵەدا بە سەرۆکایەتی سەرۆک بافڵ جەلال تاڵەبانی رۆژ لە دوای رۆژ بەهێزتر بووە.

قوباد تاڵەبانی ئاماژەی بەوەشدا کە ئەوانەی لە نزیکەوە سەرۆک بافڵ دەناسن، دەزانن کە بەڵێنێک بدات، جێبەجێی دەکات. وتیشی: "بەر لە دوو ساڵ، بەڵێنیدا کە هاوسەنگی هێز دروست بکاتەوە و جێبەجێی کرد، لە دوای سەرکەوتنە یەک لە دوای یەکەکانی یەکێتی لە کەرکوک و موسڵ و لە گۆڕینی  یاسای هەڵبژاردن و چەندین سەرکەوتنی دیکەش، ئێستا چ لەسەر ئاستی عێراق و چ لەسەر ئاستی نێودەوڵەتیدا یەکێتی نەک وەک جاران هێزێکی پەراوێزخراو و بێ کاریگەر نییە، بەڵکو ئەو هێزەیە لەناو هەموو هاوکێشەکاندا حیسابێکی گەورە بۆ سیاسەت و بڕیار و هەڵوێستی یەکێتی دەکرێت".، وتیشی: هیچ لایەنێکی دیکی سیاسی و ئۆپۆزسیۆنیش کەرەستەی پیویستیان نییە بۆ چاکسازی و راستکردنەوەی رێڕەوی حکومڕانی" و راشکاوانەش دەڵێت:" تەنانەت یەکێتی چوار ساڵ لەمەوبەریش توانای چاکسازی و گۆڕانکاری نەبوو، بەڵام یەکێتی لەم قۆناغەدا و بەو سەرۆکە بەهێزەی کە هەیەتی و بەو خۆڕێکخستنەوەیە کە کردویەتی و بەهۆی چەندین تایبەتمەندی دیکەشەوە تەنها لایەنێکە کە  کەرەستەی پێویستی بۆ چاکسازی راستەقینە و راستکردنەوەی رێڕەوی حکومڕانی هەیە و ئەمجارە دەتوانێت و دەشیکات، چونکە ئەمە بەڵێنی سەرۆک بافڵ و ئیرادە و خواستی سەرکردایەتی و هەموو کادر و ئەندام و جەماوەری یەکێتییە.

لێپرسراوی مەکتەبی سکرتارییەتی سەرۆک مام جەلال لە بەشێکی دیکەی کۆبوونەوەکەدا رایگەیاند: "نەیارانی یەکێتی ئەمجارەیان دڵنیان لە سەرکەوتنی گەورەی یەکێتی، هەربۆیە هەوڵ دەدەن ئاژاوە و کێشە دروست بکەن و بێ ڕێزی بە کاندیدەکان و کەسایەتییەکانمان بکەن".

PUKMEDIA