ئەو دوو چەکدارەی تەقەیان لە بنکەی پۆلیسی چوارچرا کرد دەستگیرکران

ئاسایشی سلێمانی

چەکدارە دەستگیرکراوەکان

دوا نیوەڕۆی ئەمڕۆ 23ی9ی2025 لەگەڕەکی چوارچرای شاری سلێمانی، دوو چەکدار هەڵدەکوتنە سەربنکەی پۆلیسی چوارچرا و تەقە دەکەن، بەڕێوەبەرایەتی گشتی ئاسایشی سلێمانیش ئاشکرای دەکات:" چەکدارەکان دەستگیرکراون و هەڵگری  بیری توندڕەوین".

بەڕێوەبەرایەتی گشتی ئاسایشی سلێمانی  لە راگەیەندراوێکیدا ئاماژەی بەوەکرد: دوای نیوەڕۆی ئەمڕۆ 23ی9ی2025  لەگەڕەکی چوارچرای شاری سلێمانی، دوو چەکدار هەڵدەکوتنە سەربنکەی پۆلیسی چوارچرا.

دەشڵێت: دوای ڕووبەڕوبونەوەی چەکداری لەگەڵ پاسەوانەکانی ئەو بنکەیە، توانرا هەردوو چەکدارەکە دەستگیربکرێن لەلایەن هێزەکانی پۆلیس، کارمەندێکی پۆلیس لەڕووداوەکەدا برینداربوو.

بەڕێوەبەرایەتی گشتی ئاسایشی سلێمانی راشیگەیاند:لەسەر ئەم ڕووداوە دەستبەجێ هێزەکانی ئاسایش بەمەبەستی هاوکاریکردنی هێزەکانی پۆلیس دەگەنە شوێنی ڕووداوەکە و دوای ئەنجامدانی لێکۆڵینەوەی سەرەتایی لەگەڵ تۆمەتباران دانیان بەوەداناوە کە هەڵگری بیری توندڕەوین.

لە کۆتایشدا رایگەیاندووە: لەئێستادا هەردوو تۆمەتبار بەبڕیاری دادوەری لێکۆڵینەوەی ئاسایش ڕاگیراون و لێکۆڵینەوە لە دۆسیەکانیان بەردەوامە.

PUKMEDIA