قوباد تاڵەبانی: هاووڵاتی ناڕازی هیوایان هەر بە یەکێتی ماوە

راگەیاندنی قوباد تاڵەبانی

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان بۆ هەڵبژاردنی خولی شەشی ئەنجومەنی نوێنەرانی عیراق،  لە کۆبوونەوەی لەگەڵ هەڤاڵانی سێکتەرەکانی هەڵبژاردن لە قەزای سۆران داوای لێکردن لەم ماوەیەدا هەوڵ بدەن قەناعەت بە زۆرترین کەس لەو هاووڵاتییە ناڕازییانە بکەن تا بەشداری لە هەڵبژاردندا بکەن.

قوباد تاڵەبانی لە کۆبوونەوەکەدا رایگەیاند: کاتێک قسە لەگەڵ زۆرێک لەو هاووڵاتییانە دەکەم کە ئامادەنین بەشداری لە هەڵبژاردندا بکەن، دانی پێدادەنێن کە ئەگەر تەنها لایەنێک هەبێت بتوانێت لە بەغداد کێشەکان چارەسەر بکات، یەکێتیی نیشتمانیی کوردستانە.

 داواشی لێکردن لەم ماوەیەدا هەوڵ بدەن قەناعەت بە زۆرترین کەس لەو هاووڵاتییە ناڕازییانە بکەن تا بەشداری لە هەڵبژاردندا بکەن، چونکە هەرچەندە بە درێژایی ساڵانی رابردوو هەموو رێگەیەکیان تاقی کردووەتەوە و هیوابڕاوبوون لە پرۆسەی سیاسی، بەڵام هێشتا هیوایەکیان هەر بە یەکێتی ماوە.

قوباد تاڵەبانی دووپاتیشی کردەوە: هەڤاڵانمان دەبێت هانیان بدەن و هیوایان بۆ بگەڕێننەوە، یەکێتی وەکچۆن لەسەرەتای دامەزراندنیدا هیوای بۆ خەڵکی کورد گەڕاندەوە، بە دڵنیاییەوە لەم قۆناغەشدا بە کردار هیوا بۆ خەڵک دەگەڕێنێتەوە و کارێک ناکات دەنگدەرەکانی پەشیمان ببنەوە.

PUKMEDIA