سوید.. به‌پێی ئه‌نجامه‌ به‌راییه‌كان چه‌پڕه‌وه‌كان له‌پێش ڕاستڕه‌وه‌كانه‌وه‌ن

Reuters

وێنەیەکى پڕۆسەى هەڵبژاردنەکە

ئه‌نجامه‌ به‌راییه‌كانی هه‌ڵبژاردنه‌ گشتییه‌كانی سوید كه‌ ڕ‌ۆژی یه‌كشه‌ممه‌ به‌ڕ‌ێوه‌چوو، پێشبڕ‌كێیه‌كی زۆر نزیك له‌ نێوان چه‌پ و ڕ‌استڕه‌وه‌كان ده‌ركه‌وت و به‌پێی ئه‌نجامه‌ به‌راییه‌كان هیچ كامیان نه‌یانتوانی به‌شێوه‌یه‌كی به‌رچاو سه‌ركه‌وتن به‌ده‌ستبهێنن.

به‌پێی ئاماره‌كان كه‌ تائێستا 95% ده‌نگه‌كان جیاكراوه‌ته‌وه‌، به‌ره‌ی چه‌پڕه‌وی ئۆپۆزیسیۆن توانیویانه‌ 176 كورسی په‌رله‌مانی به‌ده‌ستبهێنن، هه‌روه‌ها به‌ره‌ی ڕاستڕه‌ویش توانیویانه‌ 173 كورسی به‌ده‌ستبهێنن.

ئه‌مه‌ش له‌كاتێكدایه‌، ئولف كریستێرسۆن سه‌رۆكوه‌زیران و سه‌رۆكی ئۆپۆزسیۆن ماگدالینا ئه‌نده‌رسۆن ئاماده‌یی خۆیان بۆ سه‌ركردایه‌تیكردنی حكومه‌تی داهاتوو ڕ‌اگه‌یاندوه‌.

به‌ جیاكردنه‌وه‌ی نزیكه‌ی له‌سه‌دا 95ی ده‌نگه‌كان، چوار پارته‌ ئۆپۆزسیۆنه‌كه‌ به‌ سه‌رۆكایه‌تی پارتی سۆسیال دیموكرات، به‌چه‌ند كورسییه‌ك زیاتر سه‌ركه‌وتنی به‌ده‌ستهێناوه‌ .

ئه‌نده‌رسۆن كه‌ له‌ ساڵی 2021 تا 2022 سه‌رۆكوه‌زیرانی سوید بوو، وتی: له‌ئێستادا ئێمه‌ له‌پێشه‌نگین و ئه‌گه‌ر ئه‌مه‌ پشتڕ‌است بكرێته‌وه‌، سوید حكومه‌تێكی نوێی ده‌بێت، به‌ڵام پارته‌كه‌ی كه‌ گه‌وره‌ترینه‌ له‌ وڵاته‌كه‌دا نزیكه‌ی له‌سه‌دا 28ی ده‌نگه‌كانی به‌ده‌ستهێناوه‌.

له‌به‌رامبه‌ردا كریسته‌رسۆن ڕ‌ه‌تیده‌كاته‌وه‌ دانبه‌وه‌دا بنێت، هیچ لایه‌نێك براوی هه‌ڵبژاردنه‌كان بێت و ئه‌گه‌ر ئه‌نجامه‌كان وه‌ك خۆیان بمێننه‌وه‌، ڕ‌ێز له‌ هه‌وڵه‌كانی ئه‌نده‌رسۆن ده‌گرن بۆ پێكهێنانی حكومه‌ت، به‌ڵام گومانی خۆی ده‌ربڕ‌ی له‌ توانای چوار پارته‌ ئۆپۆزسیۆنه‌كه‌ بۆ گه‌یشتن به‌ به‌رنامه‌یه‌كی هاوبه‌شی حكومه‌ت به‌هۆی ناكۆكییه‌كانیان .

ئاماژه‌ی به‌وه‌شكرد: له‌ ساڵانی داهاتوودا كام حكومه‌ت سوید به‌ڕ‌ێوه‌ده‌بات، وه‌ك پرسیارێكی بێ وه‌ڵام ماوه‌ته‌وه‌.

پارتی دیموكراته‌ ڕ‌استڕ‌ه‌وه‌كانی سوید له‌ ساڵی 2010 دوای چوونه‌ ناو په‌رله‌مان یه‌كه‌مین دابه‌زینی به‌خۆیه‌وه‌ بینی و پێگه‌ی خۆی وه‌ك دووه‌م گه‌وره‌ترین پارت له‌ وڵاته‌كه‌دا له‌ده‌ستدا، ئه‌نجامه‌كه‌ش له‌ هه‌ڵبژاردنه‌كاندا وه‌ك سوپرایزێك بوو.

كریستێرسۆن به‌ڵێنی دابوو ئه‌گه‌ر سه‌ركه‌وت پارته‌كه‌ی بهێنێته‌ ناو حكومه‌ته‌وه‌، چونكه‌ له‌ خولی پێشوویدا پشتی به‌و پارته‌ به‌ستبوو بۆ ده‌سته‌به‌ركردنی پشتیوانی په‌رله‌مان.

به‌گوێره‌ی ئه‌نجامه‌ به‌راییه‌كانی هه‌ڵبژاردنه‌كه‌ی سوید، به‌ره‌ی چه‌پڕ‌ەوی ئۆپۆزیسیۆن نزیكه‌ له‌وه‌ی زۆرینه‌ی په‌رله‌مانی بباته‌وه‌، هه‌رچه‌نده‌ ره‌نگه‌ دوای جیاكردنه‌وه‌ی ته‌واوی ده‌نگه‌كان، گۆڕ‌انكاری له‌ كورسییه‌كان رووبده‌ن.


PUKMEDIA