لەسلێمانی چوار هەزار پارچە زەوی بەسەر فەرمانبەراندا دابەشكرا

راگەیاندنی سەرۆكایەتی شارەوانی سلێمانی

لەسلێمانی چوار هەزار پارچە زەوی بەسەر فەرمانبەراندا دابەشكرا

شارەوانی سلێمانی لە قۆناغێكی نوێی دابەشكردنی زەویدا، چوار هەزار پارچە زەوی بەپێی ساڵەكانی خزمەت و لیستی فەرمانگەكان و بە تیروپشكی ئەلكترۆنی  بەسەر فەرمانبەراندا دابەشكرد.

سەرۆكایەتی شارەوانی سلێمانی رایگەیاند: ئەمڕۆ 14ـی ئەیلولی 2026، بە ئامادەبوونی د. هەڤاڵ ئەبوبەكر، پارێزگاری سلێمانی و لەیلا عومەر عەلی، سەرۆكی شارەوانی سلێمانی و نوێنەرانی فەرمانگەكانی شاری سلێمانی، پاش تەواوكردنی رێكارە پێویستەكان، قۆناغێكی نوێی دابەشكردنی زەویی لە سنووری سەرۆكایەتیی شارەوانی سلێمانی دەستیپێكرد.

ئاماژەی بەوەشكرد: لە پڕۆسەیەكی تەواو بێخەوشدا و بەشێوازێكی ئەلكترۆنی و بەپێی لیستی هاتووی فەرمانگەكان، تیروپشك بۆ دابەشكردنی چوار  هەزار پارچە زەویی بەسەر فەرمانبەراندا لە پێگەكانی 1،3ـــی داربەڕوولە و 20 بەردەكەڕ تەنیشت شاری لاوان بەڕێوەچوو.

راشیگەیاند: ئەم قۆناغەی دابەشكردنی زەویی لە كاتێكدا بەڕێوەچوو كە لە ماوەی رابردوودا، بە چەند قۆناغێك 23 هەزار پارچە زەویی دیكە بەسەر فەرمانبەراندا لە سێكتەرەكانی فەرمانبەران، لاوان و سۆتكە دابەشكراون.

سەرۆكایەتیی شارەوانیی سلێمانی و لیژنەی دابەشكردنی زەویی دڵنیایی لە پاراستنی مافی هەموو فەرمانبەرێك دەدەن و رایدەگەیەنن: پڕۆسەكە بەردەوامیی دەبێت و قۆناغ دوای قۆناغ بەپێی لیستی هاتوو لە دامەزراوە حكومییەكان، زەوییان بۆ تەرخان دەكرێت و لێی سوودمەند دەبن.

بۆ بینینی لیستی ناوەكان كلیك لەم لینكە بكە:

لیستی ناوەكان

PUKMEDIA