قوباد تاڵەبانی و هەڵسووڕێنەری کاروباری باڵیۆزخانەی ئەمریکا جەخت لە چارەسەرکردنی خێرای ناکۆکییەکان دەکەنەوە

نوسینگەی رۆژنامەوانی قوباد تاڵەبانی

قوباد تاڵەبانی و ستیڤ ڤەیگن هەڵسووڕێنەری کاروباری باڵیۆزخانەی ئەمریکا لە عیراق

قوباد تاڵەبانی، جێگری سەرۆکوەزیران پێشوازیکرد لە باڵیۆز ستیڤ ڤەیگن، هەڵسووڕێنەری کاروباری باڵیۆزخانەی ئەمریکا لە عیراق و پێکەوە تاوتوێی دۆخی سیاسی هەرێمی کوردستان و عیراق و چەند پرسێکی دیکەی جێی بایەخی هەردوولایان کرد.

لە دەستپێکی کۆبوونەوەکەدا کە رۆژی دووشەممە (14/9/2026) لە هەولێر بەڕێوچوو، قوباد تاڵەبانی خۆشحاڵی خۆی دەربڕی بەوەی جارێکی تر باڵیۆز ستیڤ ڤەیگن گەڕاوەتەوە بۆ عیراق و هەرێمی کوردستان و هیوای سەرکەوتنی بۆ خواست لەم ئەرکە نوێیەدا.

لە تەوەرێکی کۆبوونەوەکەدا باس لە دۆخی سیاسیی ناوخۆی هەرێمی کوردستان کرا. هەردوولا هاوڕابوون لەسەر پێویستیی چارەسەرکردنی خێرای ناکۆکییەکان و پێکهێنانی کابینەی نوێی حکومەتی هەرێم، هەروەها جەختیان کردەوە لەسەر کارکردنی پێکەوەیی هەموو لایەنەکان بۆ پاراستنی هەرێمی کوردستان لە هەر جۆرە هەڕەشە و مەترسییەک کە بەهۆی ئاڵۆزییەکانی ناوچەکەوە رووبەرووی هەرێم ببێتەوە.

سەبارەت بە پرسی نەوت و گازیش، قوباد تاڵەبانی ئاماژەیدا بە گرنگیی چارەسەرکردنی ناکۆکییەکانی نێوان هەرێم و بەغدا و روونیکردەوە کە ئەولەوییەتی هەرێمی کوردستان دابینکردنی پێداویستییەکانی ناوخۆیە و پاشان هەناردەکردنییەتی.

لە بەشێکی دیکەی کۆبوونەوەکەدا باس لە دۆخی عیراق کرا، لەمبارەیەشەوە هەردوولا هاوڕابوون لەسەر پێویستیی پشتگیریکردنی حکومەتی عیراق و هەنگاوەکانی سەرۆکوەزیران بۆ چەسپاندنی سەروەریی یاسا و دوورخستنەوەی عیراق لە بارگرژییەکانی ناوچەکە، هەروەها جەختیش کرایەوە لەسەر بەهێزترکردنی پەیوەندییەکانی نێوان هەرێم و بەغدا و چارەسەرکردنی کێشەکان بەپێی دەستوور و هەماهەنگی و پێکەوەکارکردنی هەردوو حکومەتی هەرێم و بەغدا بۆ باشترکردنی دۆخی خزمەتگوزارییەکان و هەنگاونان بەرەو گەشەپێدانی ئابووریی عیراق.

PUKMEDIA