Qubad Talebanî û karbidestê Balyozxana Amerîka tekezî li çareserkirina nakokiyan dikin

Nûsîngeha Ragihandina Qubad Talebanî

Qubad Talebanî û karbidestê Balyozxana Amerîka

Cîgirê Serokwezîr Qubad Talebanî pêşwazî li Balyoz Steven Fagin, Kargêrê Karên Balyozxaneya Amerîkayê li Îraqê kir û bi hev re rewşa siyasî ya Herêma Kurdistanê û Îraqê û çend pirsên din ên cihê girîngiya her du aliyan gotûbêj kirin.

Di destpêka civînê de ku roja Duşemê (14/9/2026) li Hewlêrê birêve çû, Qubad Talebanî kêfxweşiya xwe derbirî ku Balyoz Steven Fagin careke din vegeriyaye Îraqê û Herêma Kurdistanê û hêviya serkeftinê ji re xwest di vî erka nû de.

Di tewerekî civînê de behsa rewşa siyasî ya navxweyî ya Herêma Kurdistanê hat kirin, her du alî li ser pêwîstiya çareserkirina lezgîn a nakokiyan û pêkanîna kabîneya nû ya hikûmeta herêmê hemfikir bûn.

Her wiha tekezî li ser karkirina pêkveyî yê hemû aliyan kirin ji bo parastina Herêma Kurdistanê ji her cure gef û metirsiyeke ku ji ber aloziyên navçeyê rûbirûyî herêmê bibe.

Derbarê pirsa petrol û gazê de jî, Qubad Talebanî amaje bi girîngiya çareserkirina nakokiyên di navbera herêmê û Bexdayê de kir û zelal kir ku pêşîniya Herêma Kurdistanê dabînkirina pêdiviyên navxwe ye û paşê hinardekirina wê ye.

Di beşeke din a civînê de behsa rewşa Îraqê hat kirin, di vî warî de jî her du alî li ser pêwîstiya piştgiriya hikûmeta Îraqê û pêngavên Serokwezîr bo çespandina serweriya yasayê û dûrxistina Îraqê ji aloziyên navçeyê hemfikir bûn.

Her wiha tekezî li ser xurtirkirina peywendiyên di navbera herêm û Bexdayê de û çareserkirina pirsgirêkan li gorî destûrê û hemahengî û pêkve karkirina her du hikûmetên herêmê û Bexdayê hat kirin ji bo baştirkirina rewşa xizmetguzariyan û gav avêtin ber bi geşepêdana aborî ya Îraqê ve.

PUKMEDIA