Di Lûtkeya Neteweyên Yekbûyî de şer û zîrekiya çêkirî tên gotûbêjkirin

Cîhan 10:40 AM - 2026-09-20

Donald Trump, Serokê Amerîkayê û Antonio Guterres, Sekreterê Giştî yê Neteweyên Yekbûyî

Lûtkeya Neteweyên Yekbûyî li New Yorkê dest pê dike û şerên Rojhilata Navîn, Ûkrayna û metirsiyên zîrekiya çêkirî dê bibin mijarên sereke yên gotûbêjên wê.

Biryare ku di 22ê Îlonê de, xula 81an a civîna giştî ya Komela Giştî ya Neteweyên Yekbûyî li bajarê New Yorkê yê Amerîkayê dest pê bike û di civînê de, ku ji bo duyemîn sal li ser hev bi serokatiya Donald Trump Serokê Amerîkayê ve tê birêvebirin, nêzîkî 130 serok û serokwezîrên welatên cîhanê beşdar bibin.

Qeyrana Rojhilata Navîn û qada navneteweyî

Tewereya sereke ya civînê dê li ser berdewamiya şerê di navbera Amerîka-Îsraîlê de li dijî Îranê be, ku bûye sedema bilindbûna zextê û nearamiya navçeyê, herwiha gefxwarina Hûsiyan li ser keştivaniyê li Deryaya Sor bûye sedema nîgeraniyan.

Di wê çarçoveyê de, biryar e ku Mesûd Pizîşkiyan Serokkomarê Îranê, di roja çarşemê de û Binyamîn Netanyahu, Serokwezîrê Îsraîlê, di roja pêncşemê de gotarên xwe pêşkêş bikin. Li hemberî vê yekê, tevî ku Mehmûd Ebas Serokê Filîstînê ji ber redkirina vîzeyê ji aliyê Amerîkayê ve nikare beşdar bibe, lê Komela Giştî deng da ku bi vîdyoyê gotarê pêşkêş bike.

Metirsiyên zîrekiya çêkirî (AI)

Pêşketinên lezgîn ên zîrekiya çêkirî û hişyariyên serokên teknolojiyê derbarê ji dest çûna kontrola vê teknolojiyê, bûye cihê girîngiya lûtkeyê. Antûnyo Gûtêrêş Sekreterê Giştî yê Neteweyên Yekbûyî, daxwaza danîna sînor û pîvanên hevbeş kir ji bo pêşîgirtina li karesatên mezin. Li hemberî vê yekê, Donald Trump ew metirsî bi "nûçeyên nerast" pênase kir.

Di heman demê de biryare ku Sam Altman, Rêveberê Cîbicîkar ê kompaniya OpenAI, li Civata Asayişê li ser vê mijarê gotarekê pêşkêş bike.

Şerê Ûkraynayê

Di pirsa Ûkraynayê de, Volodîmîr Zelenskî Serokê Ûkraynayê û Sergey Lavrov Wezîrê Derve yê Rûsyayê, beşdar dibin. Di demekê de ku Trump hewlên xwe yên berdewam dide ji bo bidawîanîna wî şerî, Gûtêrêş hişyarî da li ser bandora ambargoyên Deryaya Reş li ser ewlehiya xurek û aboriya cîhanî.

cihê balê ye ku Şî Cînpîng, Serokê Çînê, beşdarî civîna Neteweyên Yekbûyî nabe û biryar e ku di 24ê Îlonê de li Waşintonê bi Trump re bicive. Herwiha ev civîn di demekê de ye ku xula serokatiya Antûnyo Gûtêrêş di dawiya sala 2026an de diqede û pêvajoya hilbijartina cîgirê wî hîn bi rê ve diçe.

PUKMEDIA