Îraq û Fransa çendîn peymanên stratejîk îmze dikin

Nûsîngeha Ragihandina Serokwezîrê Îraqê

Merasîma Îmzakirina Peymanan

Serokwezîrê Îraqê Elî Zeydî li Parîsê, bi Serokê Fransayê Emmanuel Macron, serpereştiya îmzekirina şeş peyman û yadaştek têgihiştinê kir ku warên enerjî, aborî, kareba, leşkerî, xwendin û çandê li xwe digirin.

Li gorî daxuyaniya hevpar a her du aliyan, di warê leşkerî û ewlehiyê de her du aliyan li ser berdewamiya hevkariyan piştî bidawîbûna erka Hevpeymaniya Navdewletî li hev kirin, di nav de parastina sînor û dabînkirina serweriya axa Îraqê.

Her wiha Wezareta Parastinê ya Îraqê bi kompanyaya Fransî ya bi navê "HARMATTAN AI" re li ser sîstema berevaniya asmanî peymanek îmze kir, ji bilî vê yekê bi kompanyayên Fransî re li ser kirîna sîstema li dijî dronan, topavêj û çavdêriyê gihîştin têgihiştinê.

Di warê aborî û enerjiyê de, hikûmeta Îraqê û kompanyaya (TotalEnergies) yadaşteke têgihiştinê ji bo cîbicîkirina çend projeyên nû yên neft û ceyranê îmze kirin.

Di heman demê de di civîna 50 nûnerên kompanyayên mezin ên Fransayê de li Forumê Aborî yê Parîsê, Ajansa Pêşxistinê ya Fransayê (AFD) sozên xwe yên piştgiriya darayî ji bo Îraqê nû kirin, û têgihiştinek jî di warê veguhastina asmanî de di navbera her du welatan de hat îmzekirin.

Di çarçoveya peymanan de, Parîsê piştgiriya xwe ji bo pêşxistina sînemaya neteweyî ya Îraqê û parastina şûnwaran ragihand, bi taybetî piştî vekirina Mûzexaneya Mûsilê bi hevahengiya bi Mûzexaneya Louvre re.

Di heman demê de di warê xwendinê de, her du aliyan li ser berfirehkirina lîsteya zanîngehên Fransî ji bo xwendekarên şandî yên Îraqê û pêşxistina lêkolînên îstîxbarata çêkirî (jîriyê destkar) li hev kirin.

Di dawiyê de, Serokwezîrê Îraqê pesna hikûmeta Fransayê da ji ber vekirina nexweşxaneya Şingalê.

PUKMEDIA