سەپاندنا ​ئەڕکێن گران و بێبەهرکرن ژ مافان

PUKMEDIA

محەمەد مەهیدی

د دەستهەڵاتداریا سەردەم دا، دەوڵەت و حکومەت ل سەر بنیاتێ ڕێککەفتنەکا جڤاکی ئاڤا دبن کو تێدا وەڵاتی ئەرکێن خۆ یێن دارایی و یاسایی ب جهـ دئینیت؛ د هەمبەر دا حکومەت پێگیر دبیت ب دابینکرنا ئاسایش، خزمەتگۆزاریێن بنەڕەتی، و پاراستنا کەرامەت و ژیارا خەڵکی. بەلێ ئەوا ئەڤڕۆ ل هەرێما کوردستانێ دهێتە دیتن، جۆرەکێ نەهەڤسەنگیێ و تێکچوونا وێ تەرازیێ یە د ناڤبەرا پابەندبوونا توند یا وەڵاتی بۆ ئەرکان، ل هەمبەر پاشڤەکێشان و خەمساریا حکومەتێ د دابینکرنا مافان دا.

د دەمەکیدا کو بارگرانییا باج، رسومات، کرێیا کارەبێ، ئاڤ و سووتەمەنیێ ب ڕەنگەکێ بەردەوام دهێتە زێدەکرن و جێبەجێکرن، مافێ سەرەکی یێ فەرمانبەران د شێوازێ مووچەیێ ڕێکوبێک و دەستکەفتێن شایستە یێن وەک پلەبەرزکرنێ دا تووشی سستبوون و ڕاوەستایانەکا درێژخایەن بوویە.

ئەڤێ سیاسەتێ نە ب تنێ کاریگەریا خۆ ل سەر بڕیارا ڕۆژانە یا خێزانان هێلایە، بەلکو پێکهاتەیێ جڤاکی ژی بەرەڤ ئاڵۆزیێ بریە. ل شوینا کو کەرتێ گشتی مینا ساخلەمی و پەروەردەیا بێبەرامبەر وەک مافێ ڕەوا بمینیت، لاوازبوونا نەخۆشخانە و خواندنگەهێن حکومی ڕێك بۆ بەرفرەهبوونا نەخۆشخانە، زانکۆ و خواندنگەهێن ئەهلی خۆش کرییە. ئەڤە ژی د بنەڕەت دا جوداهییا چینایەتی کوورتر دکەت و خزمەتگۆزاریێن بنەڕەتی یێن وەڵاتیان ژ مافەکێ سروشتی دگۆهڕیت بۆ «کاڵایەکێ بازرگانی» کو ب تنێ تەخەکا دیارکری شیانێن کڕینا وی هەیە. د دەمەکیدا کو حکومەت ل سەر ڤەگەڕاندنا قەر و رسوماتێن خۆ ڕژدە، ژ بیرکرن و پاشخستنا مافێن دارایی یێن وەڵاتیان دکەڤیتە خانەیا بێدادیا جڤاکی.

ئەوا گرنگە ئاماژە پێ بکەین ئەوە، کو بەردەوامبوونا ڤێ هەڤکێشەیا نەهەڤسەنگ مەترسیێ ل سەر باوەریا جڤاکی دروست دکەت. جڤاکەک کو تێدا ئەرک هەمی ب ڕێکا یاسایێ دهێنە سەپاندن بەلێ ماف تێدا دبنە ئارمانجەکا دوورەدەست، وی دەمی تووشی بێهیڤیبوونەکا کوور دبیت. لەورا گرنگە دەستهەڵاتدارێن ڤێ هەرێمێ بزانن کو چاکسازییا ڕاستەقینە ب زێدەکرنا بارێ دارایی ل سەر ملێن وەڵاتیان دەست پێ ناکەت، بەلکو ب زڤڕاندنا هەڤسەنگیێ بۆ پەیوەندیا د ناڤبەرا فەرمانبەر و دەستهەڵاتێ، و ب ڕێزگرتن ل مافێن بنەڕەتی یێن ژیانەکا ب کەرامەت و پێشکێشکرنا خزمەتگۆزارییان دەست پێ دکەت.

PUKMEDIA