قوباد تاڵەبانی: دەمانەوێت هۆکارێکی یارمەتیدەربین بۆ چەسپاندنی ئاشتی لە ناوچەکەدا

نوسینگەى راگەیاندنى قوباد تاڵەبانى

وێنەیەکى کۆبونەوەکە

قوباد تاڵەبانی، جێگری سەرۆکوەزیران پێشوازیکرد لە جێگری ئەدمیراڵ ئیدوارد ئاڵگرین، راوێژکاری باڵای بەرگریی بەریتانیا لە رۆژهەڵاتی ناوەڕاست و باکووری ئەفریقا و پێکەوە تاوتوێی دۆخی ئەمنیی عیراق و ناوچەکەیان کرد.

لە کۆبوونەوەکەدا کە ئەمڕۆ پێنجشەممە (10/9/2026) بە ئامادەبوونی شۆڕش ئیسماعیل، وەزیری پێشمەرگە بەڕێوەچوو، باس لە دوایین پێشهاتە ئەمنییەکانی ناوچەکە کرا.

قوباد تاڵەبانی رایگەیاند: لە دەستپێکی شەڕی ئەمریکا و ئێرانەوە تا ئێستا، هەرێمی کوردستان هەڵوێستێکی روون و نەگۆڕی هەبووە و بەردەوام هەوڵمان داوە کە وەک عیراق و هەرێمی کوردستان نەک تەنها بەشێک نەبین لە شەڕ و ئاڵۆزییەکان، بەڵکو هۆکارێکی یارمەتیدەربین بۆ هێوربوونەوەی شەڕ و بارگرژییەکان و چەسپاندنی ئاشتی لە ناوچەکەدا.

جێگری سەرۆکوەزیران روونیشی کردەوە: دۆخی ناوچەکە پێویستیی بە شەڕی زیاتر نییە و لە بەرژەوەندیی هەموو ناوچەکەدایە کە ناکۆکییەکان لە ڕێی گفتوگۆ و دانووستانەوە چارەسەر بکرێن.

لە تەوەرێکی دیکەی کۆبوونەوەکەدا باس لە پێویستیی زیاترکردنی ئاستی هەماهەنگی و هاوکارییەکانی نێوان هێزە ئەمنییەکانی کوردستان و عیراق و هاوپەیمانان کرا بۆ پاراستنی ئاسایش و سەقامگیریی ناوچەکە و ەرەنگاربوونەوەی تیرۆر و بنەبڕکردنی شانە نووستووەکانی گروپە تیرۆریستییەکان.

هەروەها سوپاسی رۆڵی هێزەکانی بەریتانیای کرد لە ناوچەکەدا کە رۆڵی گرنگیان بینیووە لە دروستکردنی هەماهەنگی و هاوکاریکردنی هێزە ئەمنییەکانی کوردستان و عیراق.

PUKMEDIA