ژمارەیەك مامۆستای زانكۆی سلێمانی ناویان چووە ریزبەندیی 2%ی توێژەرانی جیهان

PUKMEDIA

دەروازەی زانکۆی سلێمانی

زانكۆی سلێمانی، دەستكەوتێكی بەرچاوی لە ڕیزبەندیی جیهانیی زانكۆی ستانفۆرد بۆ ساڵی 2026 تۆمار كرد و 15 مامۆستای زانكۆكە ناویان چووە ریزبەندیی 2%ی توێژەرانی جیهان.
 
زانكۆی سلێمانی لەڕاگەیەندراوێكدا ئاماژەی بەوەكرد: هەموو ساڵێك، زانكۆی ستانفۆرد، بە هاوبەشی لەگەڵ ئێڵسڤییەر و بەپشتبەستن بە داتابەیسی سكەوپەس، هەڵسەنگاندن بۆ كاریگەرترین تویژینەوەكانی توێژەرانی جیهان دەكات و پۆلێنیان دەكات بەسەر 22 بواری سەرەكی و 174 بواری لاوەكیی زانستیدا، دەستنیشانكردنی توێژەرەكانیش پشتبەستە بە (Composite Score)ی توێژینەوەكانیان، كە ئەویش لەسەر بنەمای ئەم پێوەرانەیە:

كۆی ژمارەی ئاماژەپێدان بە توێژینەوەكان
ژمارەی H-index
ژمارەی Hm-index
ژمارەی ئاماژەپێدانەكان بەو توێژینەوانەی توێژەرەكە بەتەنها نووسیویەتی
ژمارەی ئاماژەپێدانەكان بەو توێژینەوانەی توێژەرەكە وەك نووسەری یەكەم ناوی هاتووە
ژمارەی ئاماژەپێدانەكان بەو توێژینەوانەی توێژەرەكە وەك كۆتا نووسەر ناوی هاتووە

راشیگەیاند: بەبەراورد بە ساڵی 2024، زانكۆی سلێمانی بەرەوپێشچوونی لە ڕیزبەندیی ساڵی 2026 بۆ هەردوو پۆلی هەڵسەنگاندنەكە بەخۆیەوە بینیوە:

هەڵسەنگاندن بۆ یەك ساڵ: ژمارەی توێژەران لە 11 توێژەرەوە بۆ 15توێژەر زیادی كردووە.

هەڵسەنگاندنی درێژخایەنی پیشەیی: ژمارەی توێژەران لە 3 توێژەرەوە بۆ 5 توێژەر زیادی كردووە.
 

ئەم دەستكەوتە پابەندبوونی بەردەوامی مامۆستایانمان بە پێشخستنی زانست و توێژینەوەی زانستی نیشان دەدات.

زانكۆی ستانفۆرد یەكێكە لە زانكۆ بەناوبانگەكانی ئەمەریكا و لە ساڵی (1885)دا دامەزراوەو داتابەیسی سكەوپەس یەكێكە لە بەناوبانگترین داتابەیسەكان، كە باشترین گۆڤارە زانستییەكانی تێدا تۆمار كراوە و ژمارەی ئاماژەپێدان بە توێژینەوەی توێژەران تۆمار دەكات، هاوكات ئێڵسڤییەر دامەزراوەیەكی بڵاوكردنەوەیە و خاوەندارێتی داتابەیسی سكەوپەس دەكات.

بۆ بینینی ئەنجامەكان لەسەر ماڵپەڕی ئێڵسیڤییەر، كلیك لێرە بكە.

PUKMEDIA