وەزارەتی داد راسپاردەكانی تایبەت بە كوردی فەیلی ئاراستەی ئەنجومەنی وەزیران دەكات

راگەیاندنی وەزارەتی داد

كۆبوونەوەی لیژنەی فەرمانی دیوانیی تایبەت بە سڕینەوەی شوێنەوارە خراپەكانی سەر كوردانی فەیلی

بەسەرۆكایەتیی وەزیری داد، لیژنەی فەرمانی دیوانیی تایبەت بە سڕینەوەی شوێنەوارە خراپەكانی سەر كوردانی فەیلی كۆبوونەوەی خۆی ساز كردو راسپاردەكانی بۆ پەسندكردن ئاڕاستەی ئەنجومەنی وەزیران دەكات.

بە سەرۆكایەتیی د. خالید شوانی وەزیری داد، لیژنەی فەرمانی دیوانی ژمارە (80)ی ساڵی 2026 ی، تایبەت بە بەدواداچوون و جێبەجێكردنی بەڵێنەكانی حكومەت بۆ سڕینەوەی ئەو شوێنەوارە خراپانەی بەر كوردانی فەیلی كەوتوون، بە بەشداریی نوێنەرانی ژمارەیەك لە وەزارەت و دەستە پەیوەندیدارەكان كۆبوونەوەیەكی ئەنجامدا، بە مەبەستی تاوتوێكردنی ئەو دۆسیانەی پەیوەستن بە دادپەروەری بۆ ڕۆڵەكانی ئەم توێژە و گەڕاندنەوەی مافەكانیان.

 وەزیری داد جەختی لە هەڵوێستی نەگۆڕی حكومەت كردەوە بۆ سڕینەوەی شوێنەوارە خراپەكان كە بەر كوردانی فەیلی كەوتوون، هەروەها پەرۆشیی حكومەتی بۆ گەڕاندنەوەی دادپەروەری بەرامبەریان دووپاتكردەوە.

لە كۆبوونەوەكەدا ژمارەیەك بڕیار و ڕاسپاردە دەركران وەك ئامادەكارییەك بۆ پێشكەشكردنیان بە ئەنجومەنی وەزیران بە مەبەستی پەسەندكردنیان؛ كە بریتی بوون لە بەدواداچوون بۆ گەڕاندنەوەی موڵك و ماڵ و زەوییە دەستبەسەرداگیراوەكان، سەرەڕای دوكیۆمێنتكردنی ئەو پێشێلكارییانەی لە سەردەمی ڕژێمی پێشوودا هەمبەر كوردانی فەیلی ئەنجامدراون لەسەر ئاستی نێودەوڵەتی، لە میانی زیاكردنی نوێنەرێكیان بۆ لێژنەی ئامادەكردنی ڕاپۆرتە نێودەوڵەتییەكانی تایبەت بە كەیسەكانی مافی مرۆڤ.

هەروەها ڕاسپاردەكان ئامادەكردنی ئەرشیفی نیشتمانی بۆ تاوانەكانی جینۆساید و ڕاگواستنی زۆرەملێیان لەخۆگرت، لەگەڵ جەختكردنەوە لەسەر پێویستیی ئاسانكاریكردنی ڕێكارە ئیدارییەكان و ڕاپەڕاندنی مامەڵەكانی ڕۆڵەكانی ئەم توێژە، لەگەڵ گرتنەری بڕیار و ڕاسپاردەی دیكە كە بەشدار دەبن لە چارەسەركردنی دۆسیە هەڵپەسێردراوەكان و گەڕاندنەوەی دادپەروەری بۆ زیانلێكەوتووان.

لە كۆتایی كۆبوونەوەكەدا، وەزیری داد جەختی لە گرنگیی بەردەوامیی هەوڵەكان كردەوە بۆ چارەسەركردنی دۆسیە هەڵپەسێردراوەكان و كاركردن بۆ گەڕاندنەوەی دادپەروەری بۆ زیانلێكەوتووان، بە شێوەیەك كە گەڕاندنەوەی مافەكانیان و چەسپاندنی بنەماكانی دادپەروەری و یەكسانی مسۆگەر بكات.

PUKMEDIA