ل فه‌رمانا 2014/8/3 چ ب گوندێ وه‌ردیێ هات ؟

گوندێ وه‌ردیێ یه‌ك ژ گوندێن شنگالێ یه‌ دكه‌ڤیته‌ باشوری چیایێ شنگالێ ب دووریا 10 كیلۆ مه‌تران ژ ناحیا گرعزێر دووره‌ ، ل فه‌رمانا 3ی ته‌باخا 2014ێ گوندێ وه‌ردیێ ژی وه‌كو هه‌موو گوندێن دی یێن شنگالێ قوربانی دان و راستی گه‌له‌ك نه‌خۆشیان هات و د رۆژه‌كا وه‌كی ئه‌ڤرۆدا و ل 8 هه‌یڤا 8 ل سالا 2014ێ ب ده‌هان كه‌چ و بوك و خۆرت و بیروكال كه‌فتنه‌ دده‌ستێ داعشێ دا و هنده‌ك ژ خه‌لكێ گوندی ب گوله‌یان هاتنه‌ كوشتن .

حسێن حه‌مه‌د گه‌نجه‌كێ گوندێ وه‌ردیێ یه‌ و ده‌مێ داعش ل گوندێ وه‌ردیێ حسێن ئێك بوو ژ وان كه‌سێن كو داعش ب چاڤێن خوه‌ دیتی و گوھ ل په‌یڤا وان بووی ، بۆ PUKmedia گۆت كو ل ده‌ما داعش بسه‌ر گوندێ مه‌دا گرتی داخواز ژمه‌ كر كو ئه‌م هه‌موو بچنه‌ جڤاتا مه‌زنێ گوندی ئه‌م ل وێده‌رێ كۆمكرن و بۆ ماوه‌یێ چه‌نده‌كێ دگه‌ل مه‌زنێ گوندی ئاخفتن ، داعش ژ مه‌ره‌ گۆت ل گوند دا بمینن و تشته‌ك لسه‌ر وه‌ نینه بتنێ ئالایا سپی بلندبكن ، پلانا داعش ئه‌وبو وه‌كی كۆمكوژیا گوندێ كۆچۆ ل گوندێ وه‌ردیێ ژی بكه‌ و دڤیان زلامه‌كی ل گوند دا نه‌هێلن و كه‌چ و بوكان بۆ خوه‌ ببن هه‌رچه‌نده‌ وان داخواز ژ مه‌زنێ گوندی كر و 3 كچان راده‌ستی وان بكه لێ مه‌زنێ گوند ئه‌ڤ یه‌ك ره‌تكر ب ده‌ست وانڤه‌ به‌رنه‌دان.

هه‌ردیسان سادق برۆ بۆ PUKmedia وه‌ها گۆت : ل ده‌مێ داعش كه‌فتی گوندێ وه‌ردیێ ئه‌ز ل گوندبووم ژبه‌ركو بابێ من یێ نه‌خوه‌شبوو و نه‌ دشیا برێڤه‌ بچیت من و دایكا من چاڤدێریا وی دكر و گه‌له‌كێن دیژی ل گوند دا هه‌بوون وه‌كی مه‌ لێ مه‌ شیانێن ره‌ڤینێ نه‌بوون، و من ب چاڤێن خوه‌ دیت ده‌ما داعشێ كچ و بوك و زه‌لام و خۆرت بار كرینه ترۆمبێلێن مه‌زن من و دایك و بابێن خوه‌ ل جهه‌كی خوه‌ ڤه‌شارتبوو هه‌تا كو داعش ژ گوند ده‌ركه‌فتی و مه‌ژی بله‌ز و ب حاله‌كی خراب خوه‌ گه‌هانده‌ چیایێ شنگالێ ژبه‌ركو داعش لناڤ گوند دگه‌ریا مه‌ نه‌ دشیا به‌ری هنگێ ژ گوند بره‌ڤن ژبه‌ركو مه‌ بچاڤێن خوه‌ دیتن ده‌ما خه‌لك ددانه‌ به‌ر گوله‌یان.

ژلایه‌كی دیڤه‌ خه‌لكێ گوندێ وه‌ردیێ داخواز ژ رێكخراوێن پاراستنا مافێن مرۆڤی و حكومه‌تا عێراقێ كرن ب زووترین وه‌خت ئێخسیرێن وان بێنه‌ رزگاركرن ژ ده‌ستێ تیرۆرستێن داعشێ و كه‌یسا ئێزدیان ب جینۆساید بێته‌ ناساندن.


PUKmedia / خێرۆ گرعزێری