دابەشکردنی مووچه‌ی خانه‌نشینی لە سلێمانی دەکرێتە ‌كارتی ئه‌لكترۆنی

سلێمانی

بۆ باشتر به‌ڕێوه‌چوونی پرۆسه‌ی دابه‌شكردنی مووچه‌ی خانه‌نشینانی سلێمانی و نه‌هێشتنی قه‌ره‌باڵغی له‌بانكه‌كان و بنكه‌كانی دابه‌شكردنی مووچه‌، له‌مانگی داهاتووه‌وه‌ خانه‌نشینانی سلێمانی به‌كارتی ئه‌لكترۆنی مووچه‌ وه‌رده‌گرن.

له‌وباره‌یه‌وه‌ شۆخان عومه‌ر به‌ڕێوه‌به‌ری بانكی مه‌ڵكه‌ندی به‌ سایتی ره‌سمی یه‌كێتیی نیشتمانیی كوردستان PUKMEDIA ی راگەیاند: "له‌مانگی داهاتووه‌وه‌ مووچه‌ی خانه‌نشینی شارستانی له‌ڕێی كارتی ئه‌لكترۆنییه‌وه‌ دابه‌شده‌كرێت".

وتیشی: "له‌قۆناغی دووه‌می ئه‌م پرۆسه‌یه‌ خانه‌نشینی سه‌ربازیش ده‌گرێته‌وه‌ و ئه‌وانیش كارتی ئه‌لكترۆنییان بۆ دروستده‌كرێت، واته‌ هه‌موو خانه‌نشینێكی سلێمانی به‌و كارته‌ مووچه‌ وه‌رده‌گرێت.

ئه‌م پرۆسه‌یه‌ له‌لایه‌ن جێگری سه‌رۆك وه‌زیران و وه‌زاره‌تی دارایی و بانكی ناوه‌ندی هه‌رێم له‌سلێمانی سه‌رپێ خراوه‌و به‌شێوه‌یه‌كی گشتی سیستمی ئه‌لیكترۆنی پێدانی مووچه‌، كارئاسانییه‌كی زۆر ده‌كات، له‌ به‌ڕێوه‌بردنی پڕۆسه‌ی پێدانی مووچه‌.

گرنگترین سووده‌كانی..
٭ خێرا كردنی پڕۆسه‌ی وه‌رگرتن مووچه‌ و نه‌هێشتنی سه‌ره‌ی دوورودرێژی به‌رده‌م بانكه‌كان.
٭ نه‌هێشتنی ڕۆتیناتی وه‌رگرتنی مووچه‌.
٭  خانه‌نشین له‌ نزیكترین بنكه‌ی دابه‌شكردن مووچه‌كه‌ی وه‌رده‌گرێت، پابه‌ند ناكرێت به‌یه‌ك بنكه‌ی دابه‌شكردن.
٭ به‌ستنه‌وه‌ی چه‌ند فه‌رمانگه‌یه‌كی په‌یوه‌ندیدار به‌ دۆزی خانه‌نشینان به‌مه‌به‌ستی كار ئاسانیكردن و كه‌مكردنه‌وه‌ی ڕۆتین له‌سه‌ر خانه‌نشینان.
٭ ئاگادار كردنه‌وه‌ی خانه‌نشینان له‌كاتی پێدانی مووچه‌ له‌ڕیگه‌ی نامه‌ی ئه‌لیكترۆنییه‌وه‌.
٭ چاودێری كردنی پڕۆسه‌ی دابه‌شكردنی مووچه‌ له‌ڕووی ژمێریارییه‌وه‌ سات به‌ سات بۆ ده‌رخستنی بڕو و ڕێژه‌ی دابه‌شكردن به‌پێی بنكه‌كان.

PUKMEDIA