پەرلەمانتارێکی یەکێتی کێشەی چەند ماڵە کوردێکی خورماتوو چارەسەردەکات

PUKMEDIA

مەلا کەریم شوکور بەرگری لە مافی کورد دەکات لە خورماتوو

له‌لایه‌ن په‌رله‌مانتارێكی یه‌كێتییه‌وه‌ رێگری له‌پۆلیسی فیدراڵی كرا كه‌له‌ خانووی كورده‌كان نیشته‌جێ ببن و خانووه‌كان گه‌ڕ‌ێندرانه‌وه‌ بۆ خاوه‌نه‌كانیان.

كه‌ریم شكور ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "ئه‌مڕۆ هێزی به‌رپه‌رچدانه‌وه‌ی خێرا كه‌له‌گه‌ڕه‌كی رزگاری قه‌زای خورماتوو جێگیركرابوون گه‌ڕانه‌وه‌ شوێنی خۆیان، له‌گه‌ڵ ئه‌وه‌شدا پۆلیسی فیدراڵی ویستان بچنه‌ شوێنیان، به‌ڵام رێگریمان لێكردن و رێگه‌ماننه‌دا".

وتیشی: "به‌یاسایی و به‌و مافه‌ی هه‌مانه‌ وه‌ك په‌رله‌مانتار، توانیمان ئه‌و خانوونانه‌ بگه‌ڕێنێنه‌وه‌ بۆ خاوه‌نه‌كانیان كه‌ سه‌رجه‌یان كوردن و پێشتر له‌لایه‌ن هێزی به‌رپه‌رچدانه‌وه‌ی خێراوه‌ لێیان داگیركرابوو".

دوای روداوه‌كانی ساڵی 2017 هێزێك به‌ناوی به‌رپه‌رچدانه‌وه‌ی خێرا چوونه‌ چه‌ند گه‌ڕ‌ه‌كێكی قه‌زای خورماتوو كه‌ كورد نشین بوون و له‌چه‌ند ماڵێكی ئه‌و گه‌ڕ‌ه‌كانه‌ نیشته‌جێ بوون، هه‌ر به‌و هۆیه‌شه‌وه‌ ماڵه‌كانی تریش ئه‌و گه‌ڕ‌ه‌كه‌یان چۆڵكرد، ئه‌مڕ‌ۆ شه‌ممه‌ 4-2-2023 به‌هه‌وڵی په‌رله‌مانتارێكی یه‌كێتی توانرا ئه‌و خانوانه‌ بۆ خانه‌واده‌كانیان بگه‌ڕێندرێنه‌وه‌و پۆلیسی فیدراڵی له‌شوێنێكی دیكه‌ جێگیربكرێن.

PUKMEDIA