یەكێتی بەشداری لە كۆنگرەی هاوبەشی پارتی كار و پارتی چەپی سەوزی هۆڵەندی دەكات

PUKMEDIA

نوێنەری یەكێتی لە كۆنگرەی هاوبەشی پارتی كار و پارتی چەپی سەوزی هۆڵەندی

هەریەك لە هەڤاڵان سەركەوت محەمەد غەفور لێپسراوی بۆردی پەیوەندییەكانی دەرەوەی یەكێتیی نیشتیمانیی كوردستان و بەختیار بەكر نوێنەری یەكێتی لەهۆڵەندا، لەسەر بانگهێشتی رەسمی سۆسیال دیموكراتەكانی هۆڵەندا، بەشداری كۆنگرەی هاوبەشی پارتی كاری هۆڵەندی و پارتی چەپی سەوزی هۆڵەندی دەكات و پەیامی پیرۆزبایی سەرۆك بافڵ جەلال تاڵەبانی سەرۆكی یەكێتیی نیشتمانیی كوردستان و سەركردایەتیان بە سەرۆكایەتی هەردوو پارتەكە گەیاند. 

كۆنگرەی سۆسیال دیموكراتەكانی هۆڵەندا و پارتی چەپی سەوزی هۆڵەندی، سەرلەبەیانی رۆژی شەممە 4/2/2023 لە شاری دێنبۆش، بە ئامادەبوونی وەفدی یەكێتی و نوێنەرانی چەندین پارت و رێكخراوی سیاسی جیهانی، دەستی بەكارەكانی كرد، كە بۆ رێكخستنەوەی ناوماڵی هێزە چەپ و دیموكراتخوازەكان و ئامادەكارییە بۆ هەڵبژاردنەكانی داهاتووی هۆڵەندا. 

 وەفدەكەی یەكێتی، كە میوانی تایبەتی كۆنگرەكەیە پەیامی رەسمی یەكێتیان لە ئاستێكی باڵای حزبیدا، گەیاندە سەرۆك و سەرۆكایەتی پارتی كار و پارتی چەپی سەوز .

یەكێتی بە كۆنگرە پەیامی سیاسی خۆی دەگەیەنێت

بەختیار بەكر نوێنەری یەكێتی لەهۆڵەندا بە سایتی رەسمی یەكێتیی نیشتمانیی كوردستان PUKMEDIA ی راگەیاند: "كۆنگرەكە دەرفەتێكی باش بوو بۆ گەیاندنی پەیامی سیاسی یەكێتیی نیشتمانیی و سازدانی دیداری سیاسیی لەگەڵ لە پارتە چەپ و دیموكراتەكانەكان بەگشتی و دەستەخوشكەكانمان بەدیاریكراوی". 

پەیامی سیاسی یەكێتی دەگەیەنرێتە پارت و پەرلەمانتار و دیپلۆماتكاران

"وەفدی یەكێتی لەگەڵ كارگێڕی مەكتەبی سیاسی و لێپرسراوی مەكتەبی كاروباری دەرەوەی پارتی چەپی سەوزی هۆڵەندی و چەندین پەرلەمانتار و بەرپرس و دیپلۆماتكار لە لەهەردوو پارتەكە  كۆبوونەتەوە و دیدگا و پەیامی سیاسیی یەكیتی-یان بۆ روونكرایەوە و پتەوكردنی پەیوەندییەكانیش دووپاتكرایەوە" نوێنەری یەكێتی لەهۆڵەندا وایوت.

 وەفدی یەكێتی لەگەڵ لە خاتوو بێندیكتا لاسی سكرتێری گشتی سۆسیالیست ئینتەرناشیۆناڵ و خاتوو كاتەرینا بێرڵای جێگری سەرۆكی پەرلەمانی ئەوروپا لە پشكی پارتی سۆسیال دیموكراتی ئەڵمانیا و سەفیری وڵاتەكانی ئەمریكا، كەنەدا، بەلجیكا، پۆرتوگال، فەڕەنسا، ئەرمینیا و چەند دیپلۆماتكارێكی دیكە كۆبوونەوە.

بەهەڵبژاردن لێپرسراوی نوێی مەكتەبی كاروباری دەرەوەی پارتی كار دیاری كرا و لە دیدارێكدا و ەوفدی یەكێتی پیروزبایی لێكرد. 

پارتی كاری هۆڵەندی 

پارتێكی (سۆسیال دیموكرات)ە و هاوتای یەكێتی، ئەندامی خێزانی سۆسیالیست ئینتەرناسیۆناڵ و هاوپەیمانی پێشكەوتووخوازە، لەساڵی 1946 دامەزراوە و یەكێكە لە پارتە رەسەنەكان، بەدرێژایی مێژوو ئەگەر لە لوتكەی دەسەڵاتدا نەبووبن ئەوا هەمیشە ئۆپۆزیسۆنێكی بەهێز و رێزلێگیراو بوون.

ئەم پارتە بەرنامەی پێشڕەویكردنییان هەیە لە فراوانكردنی بەرەی چەپ لە هۆڵەندا، بۆ ئەم مەبەستە لەگەڵ پارتی چەپی سەوزی هۆڵەندی جۆرێك لە نزیكبوونەوە هەیە لەنێوانیاندا و ئەگەری هەیە بۆ داهاتوو بیرۆكەی پێكهێنانی لیستی هاوبەش و تێكەڵكردنی فراكسیۆنەكان ببەنە قۆناغی جێبەجێكردن و تا ئاستی یەكگرتن هەنگاوبنێن. 

لە یەكەم هەنگاودا ھەریەك لە كۆنگرەی پارتی كار و پارتی چەپی سەوز بڕیاریاندا كاری پێكەوەیی و فراكسیۆنی هابەشیان هەبێت لە ژووری یەكەمی پەرلەمان كە هاوشێوەی ئەنجومەنی پیرانە. بە بەستنی كۆنگرەی هاوبەش لەنێوان ئەم دوو پارتە وقۆناغی پڕاكتیكی كاری هاوبەش و سەركەوتنی گەورە هەنگاوی یەكەمی تێپەڕاند.

*پارتی چەپی سەوز *

پارتێكی سیاسی هۆڵەندییە و ئیمزای چەپی پێشكەوتنخوازانەی هەیە. پارتی چەپی سەوز لە ساڵی 1990 دوای یەكگرتنی چوار پارتی چەپ دامەزراوە كە بریتین لە PPR، PSP، CPN و EVP.

ژمارەی ئەندامەكانی پارتەكە 33 هەزاری تێپەڕاندووە كە زۆربەیان گەنجن. لە پەرلەمانی هۆڵەندا و پەرلەمانی ئەوروپا فڕاكسیۆنەكانیان كاران و ئەندامی بڵۆكی سەوزەكانن. لەسەر ئاستی شارەوانییەكانی هۆڵەندا 537 ئەندامی ئەنجومەنی شارەوانییان هەیە. پۆستی پارێزگاری ئەمستەردام لەم پارتەیە و بەیەكێك لە پارەتە هەرە خاوەن پێگە جەماوەرییەكان هەژمار دەكرێن.

PUKMEDIA