یەکێتی و وەفدێکی سەربازی ئەمریکی: هێزی پێشمەرگە رێکخراوتر بێت

PUKMEDIA

کۆبوونەوەی یەکێتیی نیشتمانیی کوردستان و وەفدێکی سەربازی ئەمریکی

یەکێتیی نیشتمانیی کوردستان و وەفدێکی سەربازی ئەمریکی باسیان لە گرنگی چاکسازی کردن لەوەزارەتی کاروباری پێشمەرگە کرد لەسەر بنەمای یاداشتنامەی لێکتێگەیشتنی نێوان هەردوو وەزارەتی بەرگری ئەمریکا و کاروباری پێشمەرگە.

رەفعەت عەبدوڵڵا و دەرباز کۆسرەت رەسوڵ کارگێڕانی مەکتەبی سیاسی یەکێتی وقوباد تاڵەبانی، ئەمڕۆ یەک شەممە ٥-٢-٢٠٢٣، لە هەولێر، پێشوازییان لە وەفدێکی سەربازی ئەمریکی و کونسوڵی گشتی ئەمریکا کرد و پێکەوە باسیان لە هەماهەنگی کردن لەپێناو جێبەجێ کردنی ناوەڕۆکی یاداشتنامەی لێکتێگەیشتنی نێوان هەردوو وەزارەتی بەرگری ئەمریکاو کاروباری پێشمەرگە کرد.

لەکۆبوونەوەکەدا ستایشی هەوڵەکانی ئەمریکا و هاوپەیمانان کرا کە هەموو کات هاوکار بوون، بەتایبەت لە پرسی چاکسازی لە هێزەکانی پێشمەرگەو لەو پێناوەشدا بەوردی گفتوگۆ لەبارەی ناوەڕۆکی ئەو یاداشتنامەیە کرا و جەخت لەسەر گرنگی جێبەجێکردنی ناوەرۆکەکەی کرایەوە بۆ ئەوەی هێزی پێشمەرگە رێکخراوتر بێت.

وەفدی یەکێتی ئاماژەی بەوەشدا کە ئامادەی هەموو هەماهەنگییەکن و نوێنەرانمان لەناو هێزەکانی پێشمەرگە راسپاردووە کە ئاسانکاری بکەن لەوبارەیەوە.

لە کۆبوونەوەکەدا، لیوا روکن عومەر سەرۆکی ئەرکانی هێزەکانی حەفتا و لیوا روکن بەختیار محەممەد ئەمینداری وەزارەتی کاروباری پێشمەرگە ئامادەبوون.
PUKMEDIA