هاوسۆزییەکان بۆ کارەساتبارانی بوومەلەرزەکەی تورکیا و سوریا

PUKMEDIA

هاوسۆزییەکان بۆ کارەساتبارانی بوومەلەرزەکەی تورکیا و سوریا

بەرەبەیانی ئەمڕۆ ٦-٢-٢٠٢٣ بوومەلەرزەیەک بەپێوەری رێختەری ٧.٤ چەند شارێکی تورکی و سوریای هەژاند و بەوهۆیەشەوە ژمارەیەکی زۆر گیانلەدەستدان و برینداری لێکەوتەوە، لەو چوارچێوەیەشدا ژمارەیەک هاوسۆزی و هاوخەمی ئاڕاستەی خانەوادەی کارەساتبارانی رووداوەکە کران کە ئەمانەی خوارەوە دەقەکانیانە.

سەرۆك بافڵ: هاوخەمی رووداوەكەی توركیا و سوریاین

قوباد تاڵەبانی: هاوخەمی ئازیزانمانین لە توركیا و سوریا

فراکسیۆنی یەکێتی لە ئەنجومەنی نوێنەرانی عیراق: بەهانای خەڵکی لێقەوماوی رۆژئاوا و باکوری کوردستانەوە بچن

بەهۆی رووداوی سروشتی بوومەلەرزەوە، لە وڵاتانی تورکیا و سوریا زیانی گیانی و ماڵی زۆری لێکەوتەوە، بەتایبەتی ناوچەکانی باکوری کوردستان و ڕۆژئاوای کوردستان، کە دەیان هاوڵاتی گیانیان لەدەستداوەو دەیانی تریش برینداربوون و سەدان هاوڵاتی تریش بێ ماڵ و حاڵ بوون و دەیان خانوو و باڵەخانەش رووخاون.
فراکسیۆنی یەکێتی لە ئەنجومەنی نوێنەرانی عێراق بەخەم و پەژارەیەکی زۆرەوە، هاوخەمیی خۆی دەگەیەنێتە قوربانیەکان و لەخوای گەورەش دەپارێتەوە کە شیفای بریندارەکان بدات.
داوا لە حکومەتی عێراقی فیدرال و حکومەتی هەرێمی کوردستان و هەموو وڵاتانی دۆست و ئاژانس و رێکخراوە فریاگوزارییە نێودەوڵەتیەکان دەکەین بەهانای خەڵکی لێقەوماوی رۆژئاوا و باکوری کوردستانەوە بچن و ئەرکی مرۆڤدۆستی خۆیان بەجێبگەیەنن.

فراکسیۆنی یەکێتی لە ئەنجومەنی نوێنەرانی عێراق

د. محەمەد سابیر: هاوسۆز و ماتەمی سوریا و تورکیاین

لە پەیامێکدا باڵيۆز دکتۆر محەمەد سابیر، سەرۆکی دامەزراوەی سەرۆک جەلال تاڵەبانی هاوخەمی خۆی بۆ کەس و کاری قوربانیانی کارەساتی بومەلەرزەکەی باکور و رۆژئاوای کوردستان و سوریا و باشوری خۆرهەڵاتی تورکیا رادەگەیەنێت..
 
لە پەیامەکەدا هاتوە “هاوخەمی و ماتەمی خۆمان رادەگەیەنین؛ بۆ کەسوکارو خێزانی ئەو کەسانەی کە لە کارەساتی بومەلەرزەکەی بەرەبەیانی ئەمڕۆدا لە باکور و رۆژئاوای کوردستان و سوریا و باشوری خۆرهەڵاتی تورکیا بونە قوربانی و ئازیزانی خۆیان لەدەستدا و برینداربون و بەشێکی زۆریان ماڵ و شوێنی حەوانەوەیان لێ خاپور بوو. 

لە پەروەردگاری مەزن داواکارین؛ کە شیفای هەرچی زووی بریندارەکان بدات و قوربانیانیش بەر رەحمەتی خۆی بخات،  هاوسۆزی ماتەم و پەژارەش بۆ کەس و کاری قوربانیان دەنێرین”.

باڵیۆز دکتۆر محەمەد سابیر
سەرۆکی دامەزراوەی سەرۆک جەلال تاڵەبانی

گەلاوێژ خان: بە خەمێكی زۆرەوە بەشداری كۆڤان و پەژارەی كەس و كاری قوربانیەكانم

هەواڵی دڵتەزێنی كارەساتەكەی بەربەیانی ئەمڕۆ دووشەمە، كەژمارەیەكی زۆر قوربانی لێكەوتەوە لە ناخەوە دڵتەنگی كردم. 

كارەساتی بوومەلەرزەكەی باكوری كوردستان و توركیاو ڕۆژ‌ئافاو سوریا كەبەداخەوە سەدان كوژراوو برینداری لە خەڵكی مەدەنی لێكەوتەوە، كارەساتێكی قورس و كاریگەرە بەتایبەت كەتادێت ژمارەی قوربانیەكانی لەزیادبوندایەو ئاسەوارێكی ترسناك بەدوای خوێدا جێهیشتووە.

بە خەمێكی زۆرەوە و لە قوڵایی دڵەوە بە شداری كۆڤان و پەژارەی كەس و كاری قوربانیەكانم لەیەزدانی مەزن داواكارم قوربانیەكان بە بەهەشتی بەرینی خۆی شاد بكات و شیفای خێراش بۆ بریندارەكان بنێرێت.

لە كارەساتی وا گەورەدا تەنیا خودای مەزن دەتوانێت ڕەحم و سەبوری خۆی بە هەمووان بدات.

گەلاوێژ

#لەگەڵئێوەین
PUKMEDIA