هۆزان عەفرینی: کوردانی رۆژئاوا لە بارودۆخێکی خراپدان

دامەزراوەی میدیایی کوردسات

کەمپینی هاوکاری بۆ بوومەلەرزەکەی باکور و رۆژئاوای کوردستان

سەرۆکی ئەنجومەنی پەنابەرانی کوردانی رۆژئاوا باس لە بارودۆخی ئەو ناوچانە دەکات کە تیایدا بومەلەرزە روویداوە و دەڵێت، "کوردانی رۆژئاوا لە بارودۆخێکی زۆر خراپدان و داوادەکەم هاوکارییان پێبگەیەنن تا بتوانین پێکەوە یارمەتیدەریان بین".

هۆزان عەفرینی سەرۆکی ئەنجومەنی پەنابەرانی کوردانی رۆژئاوا بە PUKMEDIA ی راگەیاند: "دەستخۆشی لە شاری سلێمانی و کەناڵی کوردسات دەکەین بۆ ئەم هەڵمەتەی لەپێناو خزمەتی کوردانی باکور و رۆژئاوا دەستیان پێکردووە".

وتیشی: "کوردانی رۆژئاوا بەتایبەت ئەو ناوچانەی کە بومەلەرزەکە زیانی پێگەیاندوون لە بارودۆخێکی زۆر خراپدان و چەندین کەس تا ئێستا لەژێر دار و بەردوی باڵەخانە روخاوەکاندا ماونەتەوە و هیچ وڵات و لایەنێک ئاوڕی لێنەداونەوەتەوە، لێرەوە داوا لە خەڵکی هەرێمی کوردستان و ئامادەکارانی ئەم کەمپینە دەکەم کە هاوکارییەکانیان بگەیەننە کوردانی رۆژئاوا تا بتوانین پێکەوە هاوکاریان بین و بەهانایانەوە بچین".

ئەمەش لە کاتێکدایە سەرلەبەیانی دوێنێ دوو شەممە 6-2-2023، بوومەلەرزەیەک بە گوڕی 7.4 پلەی رێختەر، چەند شارێکی باکور و رۆژئاوای کوردستانی هەژاند و بەوهۆیەشەوە ژمارەیەکی زۆر گیانلەدەستدان و برینداری لێکەوتەوە.
PUKMEDIA