سەرۆکی پەرلەمان: لەگەڵ دەسەڵاتەکانی دادوەری و جێبەجێکردن کێشەمان هەیە

PUKMEDIA

د.رێواز فایەق سەرۆکی پەرلەمان

رێکخراوی گەشەپێدانی مەدەنیەت CDO بە ئامادەبوونی سەرۆکی پەرلەمانی کوردستان و نوێنەرانی قوباد تاڵەبانی و مامۆستایانی زانکۆ و بەڕێوەبەری کەناڵەکان و ژمارەیەکی زۆر لە رۆژنامەنووسان، کۆنفرانسی بەرەو داهاتوویەکی باشتر بۆ ئازادی رادەربڕینی لە هەرێمی کوردستان بەرێوەبرد.    

د.رێواز فایەق سەرۆکی پەرلەمانی کوردستان لە کۆنفرانسەکەدا رایگەیاند: بەداخەوە لەناو دۆخێکی وەکو ئێستا بابەتی ئازادی مافەکان کراوە بە بابەتێکی لاوەکی، بۆیە هەندێک لە یاساکان پێویستی بە هەموارکردنەوەیە.

وتیشی: کیشەمان لەگەڵ دەسەڵاتی دادوەری و جێبەجێکردنی هەیە و کێشەی بۆشایی سیاسیمان نییە بەڵکو کێشەمان لە جێبەجێکردنی دایە.

ئاماژەی بەوەشکرد: رەتکردنەوەی بەردەوامی راپۆرتە نێودەوڵەتییەکان دۆخەکە چارەسەر ناکات.

د.رێواز فایەق ئاماژەی بەوەشکرد: پابەندی پەرلەمانی کوردستان بە پلانی هەرێمی بۆ مافەکانی مرۆڤ رادەگەیەنم، پێویستە حکومەتیش خۆی پابەند بکات بەپلانی هەرێمی بۆ مافەکانی مرۆڤ.

هاوکات د. هەڤاڵ ئەبوبەکر پارێزگاری سلێمانی لە کۆنفرانسەکەدا رایگەیاند: پێویستە جیاوازییەکان قبوڵ بکەین و نابێت ئازادی رادەربڕین تەنها بۆ چینێک بێت.

وتیشی:هاووڵاتی زەرەرمەندی سەرەکی ئەم دۆخەیە دەبیت ناکۆکییەکان تێبپەڕێنین.

پاشان بەختیار ئەحمەد بەرێوەبەری رێکخراوی گەشەپێدانی مەدەنیەت رایگەیاند: یاسای کاری رۆژنامەوانیمان هەیە، بەڵام یاسای سزادان بەرامبەریان جێبەجێدەکریت.

وتیشی: مافەکانی مرۆڤ و ئازادی رادەربرین بەش بەش ناکرێت.

پاشان لە کۆنفرانسەکەدا پانێڵێک بە ناونیشانی (بەرەو ئایندەیەکی باشتر بۆ ئازادی بیروڕا لە هەرێمی کوردستان) و بە بەشداری(تاریق جەوهەر-سەمیر هەورامی-حاکم کامەران-دانا ئەسعەد-د.پاڤێ جەمیل-کاروان ئەنوەر-شوان محەمەد) پێشکەشکرا.

PUKMEDIA