ئەمریكا نیگەرانە لە پاشەكشێی مافەكانی مرۆڤ و ئازادی و پێكهاتەكانی هەرێم

PUKMEDIA

كونسوڵی گشتی کونسوڵخانەی ئەمریكا و شاری هەولێر

كونسوڵخانەی گشتی ئەمریكا لە هەولێر رایدەگەیەنێت: "ئەمریكا نیگەرانە لە پاشەكشێی مافەكانی مرۆڤ و ئازادی رادەربڕین و راگەیاندن و مافی پێكهاتەكان و ژنان لە هەرێمی كوردستان".

كونسوڵخانەی گشتی ئەمریكا لە پەیجی تایبەتی خۆی لە تۆڕی كۆمەڵایەتی فەیسبووك، لەزاری ئێرڤن هیكس كونسوڵی گشتی ئەمریكاوە رایدەگەیەنێت: "وڵاتەكەی نیگەرانە لە پاشەكشێی مافەكانی مرۆڤ و ئازادی رادەربڕین و مافی پێكهاتەكان لە هەرێمی كوردستان"،  بۆیە دووپاتیدەكاتەوە: " ویلایەتە یەكگرتووەكانی ئەمریكا پابەندە بە پشتیوانیكردن لە ئازادیی رادەربڕین و ئازادیی راگەیاندن".

ئێرڤن هیكس دەڵێت: "ئەمریكا پێیوایە پێویستە رۆژنامەنووسان و ناوەندە میدیاییەكان رێگەیان پێبدرێت هەواڵەكان بگەیێنن بەبێ ترس لە چاوترساندن و هەراسانكردن و تۆڵە لێسەندنەوە".

هەر سەبارەت بەو تەسكردنەوەی ئازادی و مەترسی و ترساندنی رۆژنامەنووس و چالاكوانان، ئەیهان حەسەن نوێنەری زیندانیانی بادینان لە یادی دووساڵەی سزادانی زیندانیانی بادینان دەڵێت: "ئێمە زۆر بە گومانین لە جۆری مامەڵەكردنی بەرپرسانی ئیدارەی زیندانی چاكسازی لەگەڵ گیراوەكانمان تا راددەی گومانی (پیلانی رەش و تیرۆری بایۆلۆجی)".

نوێنەری زیندانیانی بادینان لە راگەینەدراوێكدا رای گشتی ئاگادار دەكاتەوە كە مەترسی لەسەر ژیانی سزادراوانی بادینان هەیە كە "رۆژنامەنوس و چالاكوانن" و دەڵێت: "گومانی تیرۆری بایۆلۆجی زیندانیانی بادینان ھەیە و بۆ پشكنین داوای لیژنەیەكی باڵای تەندروستی دەكەین" و "دەسەڵاتی دادوەری سەربەخۆ نەكرێت، لە نوسینی كۆمێنت تا سەرۆك حزبێك دەكەوێتە بەر مەترسی گرتن".

زیندانیانی هەولێر و دهۆک مافیان پێشێل دەکرێت

سه‌رۆكی تیمی پارێزه‌رانی سزادراوانی بادینانیش له‌و باره‌یه‌وه‌ ده‌ڵێت: "جیاوازییه‌كی زۆر له‌ مافی زیندانیانی سلێمانی له‌گه‌ڵ هه‌ولێر و دهۆك هه‌یه‌ و پێویسته‌ زیندانیانی هه‌ولێر و دهۆكیش وه‌ك زیندانیانی سلێمانی مافه‌كانیان پارێزراو بێت".

به‌شدار حه‌سه‌ن سه‌رۆكی تیمی پارێزه‌رانی سزادراوانی بادینان به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "جیاوازییه‌كی زۆر له‌نێوان مافی زیندانكراوانی سنوری پارێزگای سلێمانی له‌گه‌ڵ هه‌ولێر و دهۆك هه‌یه‌ و له‌ سلێمانی مافی زیندانیان پارێزراوتره‌".

ده‌شڵێت: "به‌ڕوونی نیگه‌رانی ئه‌مریكا له‌پاشه‌كشێی مافه‌كانی مرۆڤ و ئازادی راده‌ربڕ‌ین و مافی پێكهاته‌كان له‌ هه‌رێمی كوردستان دیاره‌و داوای ئازادی له‌هه‌رێمی كوردستان ده‌كات".

به‌شدار حه‌سه‌ن له‌رێی PUKMEDIA وه‌ داوا له‌ رێكخراوه‌كانی مافی مرۆڤ و کونسوڵی وڵاتان كرد، كه‌ به‌ده‌م مافه‌كانی زیندانیانی هه‌ولێر و دهۆكه‌وه‌ بچن و رێگه‌ نه‌ده‌ن مافه‌كانیان له‌وه‌ زیاتر پێشێل بكرێت.
PUKMEDIA